Hjálpum stríðshrjáðu fólki

Laugardagsmorguninn 5. september lögðum við hjónin af stað frá Keflavíkurflugvelli áleiðis til Stokkhólms og Uppsala þar sem við vorum boðin að vera viðstödd biskupsvígslu.

Þennan sama dag voru stórir atburðir að gerast sunnar í álfunni Evrópu. Flóttafólk frá Sýrlandi var að leggja af stað fótgangandi frá Búdapest og áleiðis til Austurríkis og Þýskalands. Sögulegur viðburður sem hefur hrært hjörtu okkar allra. Og ekki bara núna heldur marga mánuði aftur í tímann. Varðskipin okkar hafa verið að bjarga fólki á Miðjarðarhafi, en miklu fleiri hafa týnt lífi og drukknað vegna hörmulegra aðstæðna um borð í bátum sem ekki eru gerðir fyrir sjóferðir.

En af hverju vaknar fólk einmitt núna til meðvitundar? Mynd af þriggja ára dreng sem liggur dáinn á ströndinni hrærði hjörtu heimsbyggðarinnar. Við getum öll tengt við þessa mynd. Ég á til dæmis þriggja ára barnabarn sem ég sé fyrir mér í þessum hræðilegu aðstæðum.

Sunnudaginn 6. september vorum við viðstödd áhrifamikla messu í Uppsaladómkirkju, þar sem tveir biskupar voru vígðir. Við athöfnina flutti erkibiskup Svía, Antje Jackelin, eina bestu ræðu sem ég hef heyrt í kirkjunni. Hún byrjaði á því að mála fallega mynd af litla drengnum á ströndinni og endaði predikunina á því þegar lærisveinar Jesú sáu Jesú á ströndinni við Tíberíasvatn. Þessa predikun má lesa á vef svenska kyrkan. Svíar hafa staðið sig frábærlega vel í því að bregðast við flóttafólksvandanum. Þeir hafa sýnt náungakærleika í verki. Þennan sama dag birtust í Svenska dagbladet tölur um fjölda flóttafólks í 32 Evrópulöndum.

Árið 2014 tóku Svíar á móti 8.432 flóttamönnum á hverja milljón íbúa, en Svíar eru tæplega 10 milljónir. Það þýðir að á þessu eina ári tóku þeir á móti 84.320 manns. Og frá árinu 2008 hafa þeir tekið á móti 290.000 manns. þar af 23.290 börnum sem komu til landsins ein sins liðs.

Þjóðverjar hafa líka staðið sig mjög vel, en þeir hafa tekið á móti 2.511 á hverja milljón íbúa, en þeir eru nú rúmlega 80.000.000 sem þýðir að á árinu 2014 tóku þeir á móti 200.880 manns og frá árinu 2008 hafa þeir tekið á móti 569.000 manns, þar af 15.120 börnum sem komu ein síns liðs.

Fólk eins og við

Við hér á Íslandi erum rík þjóð, þó hér búi fólk undir fátæktarmörkum eins og í öllum öðrum ríkum Evrópulöndum. Ef við gerðum eins vel og Þjóðverjar myndum við taka á móti 837 manns á ári og ef við gerðum eins vel og Svíar myndum við taka á móti 2.810 manns.

Flóttafólkið sem nú streymir inn í Evrópu er fólk eins og við. Þau eiga sínar ástir og sína harma. Mörg þeirra eru vel menntuð og vel efnuð. Þau hafa verið hrakin af heimilum sínum í burtu frá öllum sem ekki komust með. Getum við ímyndað okkur ef værum í þeirra sporum: að verða að fara burt úr heimalandinu til að leitast við að bjarga sínu eigin lífi og lífi barna sinna.

Sagan af miskunnsama Samverjanum kennir okkur margt. Hún kennir okkur að við eigum að hjálpa fólki í neyð skilyrðislaust. Samverjinn spurði ekki hinn særða hver hefði lamið hann. Hann spurði ekki hverrar þjóðar hinn særði var. Hann spurði ekki af hverju einhver annar gæti ekki hjálpað honum. Hann gekk hreint til verks. Hann bjó um sár. Hann tók í fang sér og hann kom honum í öruggt húsaskjól. Við sem manneskjur finnum til með þeim sem þjást. Nú skulum við öll sem eitt leggja okkar af mörkum til að koma stríðsþjáðu fólki til hjálpar.