Töflufundur hjá Spilverki þjóðanna

Valgeir Guðjónsson, tónlistarmaður með meiru, skaut sakleysislegri athugasemd inn á Facebook-vegg sinn í gærkvöld, spurningu hvort stemmning væri fyrir örlítið meira lífsmarki frá Spilverki þjóðanna? „Að hætti tímans eru undirtektir mældar í svokölluðum lækum og ekki orð um það meir,“ skrifar Valgeir.

Viðtökurnar létu ekki á sér standa. Rúmlega þúsund manns hafa gefið til kynna ánægju sína með „læki“ og hvatningarathugasemdirnar hrannast upp. „Já, ég setti spekúlasjón í loftið. Þetta eru varmar viðtökur. Þetta ruddist inn,“ segir Valgeir í samtali við Vísi.

Ekki að sökum að spyrja, Spilverk þjóðanna er ein merkasta hljómsveit hinnar íslensku dægurtónlistarsögu, um það verður ekki deilt. En, hvað kom til að endurkoma Spilverksins er í deiglunni?

„Staðan er sú að eftir að hafa stigið á stokk með Diddú, á sunnudaginn var, hélt þar ótrúlegustu tónleika sem nokkur íslenskur listamaður hefur haldið. Hún spilaði þrjá landsleiki, fyrst fyrir hlé var fótboltaleikur, svo körfubolta- og handboltaleik eftir hlé, var þar allt í öllu í öllum leikjum. Magnaður konsert, með karlakór og sinfóníuhjómsveit fyrir hlé og svo enduðum við á því að koma saman, hún og gamli rokkurinn. Þá náttúrlega fannst okkur það svo skemmtilegt að það kom upp einhver vinkill að kannski væri gaman að gera eitthvað meira eftir að búið var að brjóta þennan ákveðna ís.“

Valgeir segir að Spilverkið sé ekki 110 metra grindahlaup. „En, hjól eru farin að snúast hægt og örugglega.“

Nýtt efni í farvatninu

Diddú og Valgeir, hinir tveir eru Sigurður Bjóla og Egill Ólafsson. Hvað segja þeir?

„Já, Bjólan hefur verið sá sem helst hefur verið skeptískur á að gera eitthvað en ég heyri ekki betur en hann ljái máls á því nú. En, þá yrði að pródúsera eitthvað nýtt og blanda því fagurlega saman þegar við stígum á stokk og höldum tónleika.“

Valgeir segir Spilverkshópurinn standa sér svo nærri, en hann bregður fyrir sig líkingamáli til að hafa vaðið fyrir neðan sig: „Þetta er ekk komið í formlegan farveg en gróðurmoldin er komin í pottinn og svo er spurning hvenær fræinu verður potað ofan í moldina og það hulið.“

Allir klárir í bátana

Bjólan er heit en hvað þá með söngvarann Egil Ólafsson. Síðast þegar spurðist var hann að koma sér upp seglskútu?

„Já, hann er með kútter. Tvímastraðan kútter. Sem er miklu eldri en hann. Mér heyrist á þeim hjónum að þau vilji eyða sínum sumrum þar, þú ert á seglum þannig að útgerðin er ekki dýr, og svo er maturinn allt í kringum þig í sjónum. Þetta er betri díll en að búa í Grafarvoginum.“

Valgeir segir að nú standi fyrir dyrum að taka töflufund. Og athuga með að gera eitthvað í málunum. „Það er með hljómsveitir sem virka vel einhvern tíma, þær gera það von úr viti ef vel er haldið á spilunum. Ef menn vanda sig og fara ekki í of stórar buxur.“