Stjarnan unnið fimm leiki gegn KR í röð

Stjarnan og KR mætast í 9. umferð Pepsi-deild karla á Samsung-vellinum í Garðabæ í kvöld.

Óhætt er að segja að það hafi orðið kúvending á úrslitum í innbyrðisviðureignum þessara liða á síðustu árum.

Á árum áður hafði KR gríðarlega gott tak á Stjörnunni og til marks um það tapaði Vesturbæjarliðið ekki fyrstu 21 leik sínum gegn Stjörnunni í efstu deild.

KR vann 12 af þessum 21 leik en sá frægasti kom eflaust í lokaumferðinni árið 2000 þar sem Andri Sigþórsson skoraði fernu í 1-4 sigri KR-inga í Garðabænum. Með sigrinum tryggði KR sér Íslandsmeistaratitilinn annað árið í röð.

Stjarnan komst upp í efstu deild 2009 eftir átta ára útlegð og fyrstu árin þar á eftir gekk Garðbæingum ekki að vinna KR.

Þeir færðust þó alltaf nær og nær og náðu jafntefli í báðum leikjum liðanna 2011 og 2012.

KR vann fyrri leik liðanna tímabilið 2013 en þann 21. júlí sama ár braut Stjarnan loks ísinn með 3-1 sigri á Samsung-vellinum.

Aðeins 10 dögum síðar sló Stjarnan svo KR út í undanúrslitum Borgunarbikarsins eftir 2-1 sigur í framlengdum leik í Garðabænum.

Stjörnumenn voru ekki hættir og unnu sigur í báðum deildarleikjum liðanna í fyrra; 2-1 á Samsung-vellinum og 2-3 vestur í bæ, en það var fyrsti sigur Stjörnunni á KR á KR-vellinum. Stjarnan vann einnig leik liðanna í Meistarakeppni KSÍ í vor.

Stjarnan hefur því unnið fimm leiki gegn KR í röð, þrjá í deild, einn í bikar og einn í Meistarakeppninni. Og séu síðustu átta deildarleikir liðanna skoðaðir kemur í ljós að KR hefur aðeins unnið einn þeirra; fyrri leikinn 2013.

Það kemur svo í ljós í kvöld hvort Stjarnan vinnur fimmta sigurinn á KR í röð eða hvort KR-ingar snúi þessu slæma gengi gegn Garðabæjarliðinu við.

Leikur Stjörnunnar og KR hefst klukkan 20:00 og verður sýndur í beinni útsendingu á Stöð 2 Sport. Einnig verður hægt að fylgjast með leiknum í beinni textalýsingu á Vísi.