50 Cent gjaldþrota

Curtis James Jackson hinn þriðji, betur þekktur undir listamannanafni sínu 50 cent, fór fram á að vera tekinn til gjaldþrotaskipta í dag.

Í gögnum sem hann lagði fram til staðfestingar á beiðninni kemur fram að eignir og skuldir rapparans séu á bilinu 10 til 50 milljónir dala, 1,1 til 6,6 milljarðar íslenskra króna.  

Rapparinn hafði áður verið metinn á rúmlega 140 milljónir dala.

Beiðni rapparans um að vera tekinn til gjaldþrotaskipti kemur í kjölfar dómsúrskurðar þar sem honum var gert að greiða konu 5 milljónir dala fyrir að dreifa kynlífsmyndbandi í hennar óþökk.

Í myndbandinu mátti sjá konuna í ástarleikjum með kærasta sínum, rapparanum Rick Ross, en þeir 50 cent hafa lengi átt í útistöðum.

Konan, Lastonia Leviston, sem er barnsmóðir Ross, fór í mál við 50 cent eftir að hann hafði tekið sig til og talað yfir myndbandið, íklæddur hárkollu undir dulnefninu „Pimpin‘ Curly.“ Á einum tímapunkti í lýsingu rapparans kallaði hann Leviston klámstjörnu.

„Ég hafði engra kosta völ. Ég hefði aldrei nokkurn tímann gert sjálfri mér þetta,“ er haft eftir Leviston á vefsíðu The Independent.

Hér má sjá og heyra eitt af frægari og, í ljósi tíðinda dagsins, kaldhæðnari lögum rapparans.

Þetta er ekki í fyrsta sinn sem peningamál rapparans komast í sviðsljósið en bankareikningur 50 Cent var frystur undir lok síðasta árs. Ástæða þessara aðgerða var að 50 Cent borgaði ekki rúmlega sautján milljónir dollara sem hann var dæmdur til að greiða fyrirtækinu Sleek Audio. Sleek Audio hélt því fram að 50 Cent hefði stolið hönnun þeirra á heyrnatólum og reynt að markaðssetja þau sjálfur. Dómstólar voru sammála fyrirtækinu.