Sinfónísk uppsveifla

Það er sinfónísk uppsveifla á Akureyri. Frá því að Menningarfélag Akureyrar hóf störf í byrjun árs 2015 hefur Sinfóníuhljómsveit Norðurlands vaxið fiskur um hrygg svo um munar. Samstarf Hofs og SinfóníaNord eins og hljómsveitin er stundum kölluð og nýstofnað samstarf Hofs og Hörpu hefur gert hljómsveitinni kleift að stórauka starfsemi sína. Það fyrirkomulag að hljómsveitin á heimili sitt í Hofi og borgi ekki húsaleigu til að æfa fyrir tónleika gerir vöxt sveitarinnar mögulegan. En það eru ekki síst ný sprotaverkefni SinfoníaNord sem felast í því að taka upp sinfóníska tónlist fyrir kvikmyndir og hljómplötur og samstarf hljómsveitarinnar við heimsfræga og landsfræga tónlistarmenn úr öðrum kimum tónlistarinnar sem hafa aukið tekjur og tíðni viðburða sifóníunnar um a.m.k 100%. Samstarf Hofs og Hörpu gera MAk kleift að halda stóra viðburði í Reykjavík og þar með auka tekjur viðburða MAk umtalsvert fyrir utan að kynna fyrir sunnlendingum hvað er að gerast fyrir norðan. Vel heppnuð útrás sinfóníunnar með þungarokkshljómsveitinni Dimmu og Todmobile/Steve Hackett til Reykjavíkur og nú heimsókn Leikfélags Akureyrar með Grín án Djóks eru nýleg dæmi um það.

Frá því í janúar 2015 þegar hljómsveitin hélt tónleika með gítarleikara GENESIS Steve Hackett, hefur hljómsveitin haldið 12 stóra tónleika, tvenna minni tónleika og tekið þátt í 6 upptökuverkefnum. Flest tengd upptökum á kvikmyndatónlist. Þetta eru 19. viðburðir á einu ári. Næstum tveir viðburðir á mánuði. Á þessu tímabili hafa rúmlega 6000 manns mætt á tónleika SinfoniaNord. Tekjur af miðasölu á þessa tónleika eru um 31.000.000kr. Til viðbótar eru tekjur af upptökuverkefnum sinfóníunnar um 8.000.000kr. í allt hátt í 40 milljónir.

Þetta er ekki allt hagnaður og það að halda sinfóníutónleika er dýrt og flókið starf. En þessar tekjur sífra inn um allt samfélagið á Norðurlandi. Þetta eru stóauknar tekjur fyrir meðlimi hljómsveitarinnar og listræna samstarfsmenn hennar. Kvikmyndaverkefnin skila tekjum beint til viðburðarsviðs MAk, Tónlistarskóla Akureyrar, Kammerkórs Akureyrar og stúlknakórs Akureyrarkirkju. Hótelin,veitingahúsin og samgöngufyrirtækin á svæðinu taka við fjölda íslenskra og erlendra samstarfsaðila hljómsveitarinnar. Að auki fá nemendur tónlistarskólans, dansskólans Stepp að njóta góðs af fjölbreyttri dagskrá sinfóníunar. Það er hefð fyrir því að nemendur á efri stigum TA taki þátt í tónleikum SN, sem er afar jákvætt í þjálfun góðra hljómsveitarspilara framtíðarinnar. Þá má ekki gleyma þeim fjölda fólks sem starfar við tæknivinnu, miðasölu og framhús á viðburðum. Þetta eru sætavísur, hljóðmenn, ljósamenn, myndlistarmenn, sviðsmenn, sýningarstjórar o.fl o.fl.

Svona aukning í sinfónísku lífi á Akureyrir hlýtur að hafa góð áhrif að samfélagið og á eftir að gera það að verkum að atvinnutónlistarmenn eiga eftir að líta á það sem góðan kost að setjst að á Norðurlandi og starfa við listsköpun sína.

Áfram Akureyri og SinfóníaNord.