Alfreð áður sakaður um fjársvik: Sveik fé úr fólki með hálsbindasölu

Alfreð Örn Clausen hefur áður verið sakaður um að svíkja fé af fólki. Er hann sagður hafa falsað greiðslunótur fyrir kaup á hálsbindum. Hann er nú eftirlýstur af bandarískum lögregluyfirvöldum vegna gruns um stórfelld fjársvik.

Alfreð hét áður Alfreð Hermannsson. DV greindi frá því árið 1993, þegar Alfreð var um tvítugt, að hann hefði svikið fé af fjölda fólks. Í fréttinni kemur fram að hann hefði ráðið til sín sölumenn skömmu fyrir jól það árið til að selja hálsbindi.

Einum tölustaf ofaukið

Haft er eftir nafnlausum manni sem keypti sér hálsbindi við söluborð í Austurveri að uppsett verð hafi verið 1.995 krónur. Þegar litið hafi verið á greiðslukortayfirlitið virtist bindið þó hafa hækkað um tíu þúsund krónur í verði og kostaði 11.995 krónur.

„Við höfðum nótuna í höndunum og vorum viss um að þetta væru mistök. Í bankanum kom hins vegar í ljós að tölunni 1 hafði verið bætt framan við upphæðina á sölunótunni,“ sagði maðurinn í samtali við DV.

Sjá einnig: Fengu greitt fyrir að lofa upp í ermina

Stórfellt svikamál og það fyrsta sinnar tegundar 

Í fréttinni segir að um hafi verið að ræða stórfellt svikamál hjá greiðslukortafyrirtækjunum Visa og Kreditkrotum þar sem söluaðili hafi breytt upphæðum á fjölda greiðslukortanóta og þannig svikið þannig út ríflega eina milljón króna. Viðskipti Alfreðs hafi öll átt sér stað með svokölluðum strauvélum og að honum hafi tekist að selja þriðja aðila flest allar fölsuðu sölunóturnar. Sá hafi svo komið þeim til greiðslukortafyrirtækjanna. Málið var það fyrsta sinnar tegundar.

Í frétt DV hinn 7. janúar 1993 er haft eftir sölumanni á vegum Alfreðs að Alfreð hefði lagt ríka áherslu á að viðskiptavinir þeirra greiddu fyrir hálsbindin með greiðslukortum. Þá ættu þeir, í stað þess að skrifa „bindi“ á sölunóturnar, að skrifa „vörur“. Sölumennirnir hefðu svo áttað sig á hlutunum eftir fréttaflutning um málið.

Með peninginn í ferðatösku

Þá sagði sölumaðurinn að í lok árs 1992 að Alfreð hefði virst liggja mikið á og beðið sölumenn sína um að hjálpa sér við að skipta íslenskum krónum í dollara. Neituðu þeir þó þeirri ósk, en viðmælandi DV ók Alfreð út á flugvöll sem sagði Alfreð hafa verið með hálfa aðra milljón króna í íslenskum krónum og Bandaríkjadölum í ferðatösku.

Sölulaunin voru ekki af verri endanum en fyrir hvert hálsbindi fengu sölumennirnir allt að helming í sölulaun.

Ekki liggur fyrir hver niðurstaða málsins var en viðskiptavinir greiðslukortafyrirtækjanna fengu upphæðirnar endurgreiddar.