Fóru aðra leið með Strætó en velferðarráð hefði kosið

Önnur leið var farin við endurskipulagningu Ferðaþjónustu fatlaðra en lagt var upp með á vettvangi velferðarráðs Reykjavíkur. Þar hafði þjónustan og leiðir til úrbóta verið til umræðu í nokkur ár áður en lagt var í breytingar.

Samkvæmt heimildum Fréttablaðsins var fyrir síðustu sveitarstjórnarkosningar takmörkuð ánægja innan meirihluta velferðarráðs borgarinnar með að fela Strætó áframhaldandi umsjón með ferðaþjónustu fatlaðra.

Fundargerðir velferðarráðs bera með sér að nokkurrar óánægju hafi gætt með kostnað við Ferðaþjónustuna, auk þess sem notendur þjónustunnar höfðu kvartað yfir þunglamalegri þjónustu. Ferðir þurfti til að mynda að panta fyrir ákveðinn tíma deginum áður og sveigjanleiki þjónustunnar var lítill.

Horfði bæði hluti fulltrúa velferðarráðs, sem og hagsmunasamtök fatlaðra, til árangurs sem náðst hafði hjá Ferðaþjónustu blindra. Þar panta notendur leigubíla þegar þörf er á akstri og eiga rétt á ákveðnum fjölda ferða í mánuði hverjum.

Einnig hafði sýnt sig að sú þjónusta var töluvert ódýrari en hjá Ferðaþjónustu fatlaðra fyrir breytinguna í nóvember síðastliðnum. Niðurgreiðsla borgarinnar er sögð hafa verið um 45 prósentum hærri á hverja ferð með Ferðaþjónustu fatlaðra en Ferðaþjónustu blindra.

Innan velferðarráðsins var þó einnig haldið á lofti öðrum sjónarmiðum og þá sér í lagi hjá fulltrúa Vinstri grænna í ráðinu, Þorleifi Gunnlaugssyni. Hann talaði fyrir því að þjónustu við fatlaða ætti ekki að skilja frá öðrum almenningssamgöngum. 

„Að mati velferðarfulltrúa Vinstri grænna verður aðeins þannig unnið gegn samfélagi aðskilnaðar,“ segir í fundargerð 6. september 2012. Tillögur hans voru þó jafnharðan felldar.

Á seinni hluta árs 2013, þegar stefndi í að efnt yrði til útboðs um aksturinn, bæði til að bæta þjónustu og draga úr kostnaði hjá borginni, þá breyttust viðhorf hjá Strætó, sem fram að þeim tíma hafði sagt ómögulegt að taka upp svokallaða samdægursþjónustu. 

Þá hafði verkfræðistofan Mannvit unnið skýrslu um sveigjanlegri þjónustu (svokallaða FLEX-þjónustu) og skipulagsbreytingar með nýju kerfi sem einnig gæti náð utan um þjónustu við fatlaða.

Seint á árinu 2013 er málið komið í hendur verkefnastjórnar hjá Samtökum sveitarfélaga á höfuðborgarsvæðinu (SSH). 

Innan SSH talaði Guðrún Ágústa Guðmundsdóttir, bæjarstjóri Hafnarfjarðar (sem 2010 til 2011 var stjórnarformaður Strætó), fyrir svipuðum hugmyndum og Þorleifur Gunnlaugsson hafði haldið á lofti í velferðarráði Reykjavíkur og vildi láta fresta útboði þar til farið hefði verið yfir hvort Strætó gæti sinnt þjónustuborðsþætti ferðaþjónustunnar. 

Sveitarfélögin vildu öll ná fram hagræðingu og síðan var ákveðið í framhaldinu að fela Strætó utanumhald þjónustunnar. Skrifað var undir samkomulag þeirra í maí 2014 og í nóvember var svo hafinn akstur í nýju kerfi.

Ekki tímabært að ræða breytingar

Hæpið er að náist á þeim hálfa mánuði sem eftir er af þeim tíma sem gefinn var til að lagfæra ferðaþjónustu fatlaðra á höfuðborgarsvæðinu að sníða vankantana af kerfinu, hefur fréttastofa RÚV eftir Stefáni Eiríkssyni, formanni neyðarstjórnar ferðaþjónustunnar. 

Rætt var við hann eftir fund Sjálfsbjargar, Öryrkjabandalagsins og Þroskahjálpar um ferðaþjónustu Strætó um miðja síðustu viku. 

Stefán segir alvarlegt atvik sem upp kom í þjónustunni á þriðjudag endurspegla að enn sé ekki komið gott lag á þjónustuna. 

„En það eru allir að leggja sig fram við að koma þessu í rétt og öruggt horf og vonandi tekst okkur það fyrr en síðar,“ er eftir Stefáni haft. 

Þá útilokar hann ekki að gerðar verði tillögur um einhverjar grundvallarbreytingar. „Það er bara ekki tímabært að segja til um það.“