Inter með fjögurra stiga forskot á toppnum

Inter náði fjögurra stiga forskoti á toppi ítölsku úrvalsdeildarinnar með öruggum 0-4 sigri á Udinese í kvöld.

Þetta er í annað sinn í fjórum leikjum sem lærisveinar Roberto Mancini skora fjögur mörk en þeir áttu í erfiðleikum með að skora framan af tímabilinu.

Varnarleikur Inter hefur hins vegar verið öflugur í allan vetur en liðið hefur haldið marki sínu hreinu í 11 af 16 deildarleikjum sem er frábær tölfræði.

Argentínumaðurinn Mauro Icardi skoraði tvö marka Inter og þeir Stevan Jovetic og Marcelo Brozovic sitt markið hvor en mark þess síðastnefnda var sérlega glæsilegt.