Tróð eitt þúsund tannstönglum í skeggið á sér

Frank Arthur Blöndahl Cassata réðst ekki á garðinn þar sem hann er lægstur þegar hann tók upp á því að stinga 1000 tannstönglum í skeggið á sér á dögunum.

Myndband af uppátæki Franks hefur vakið töluverða athygli allt frá því að hann birti það á föstudaginn. Nú hafa á annað þúsund manns barið myndbandið augum, sem sjá má hér að neðan, og því fátt annað í stöðunni fyrir Vísi en að spyrja Frank hvað hafi eiginlega vakað fyrir honum.

Spurður út í tildrög uppátækisins segir hann ástæðuna vera einfalda. Hann hafi prófað þetta áður en þá með minna skegg. Því hafi verið fátt annað í stöðunni en að sjá hvort hann gæti komið enn fleiri tannstönglum í skeggið nú þegar hann er orðinn loðnari í framan.

Frank segist sannfærður um að fyrrnefndir þúsund tannstönglar geri hann að réttmætum Íslandsmeistara í tannstönglaskeggtroði. Hann segist þó hvergi nærri hættur og ætlar Frank sér því að reyna aftur þegar skeggið er orðið enn síðara.

Frank segir það þó vera töluvert vandaverk að koma svo mörgum tannstönglum fyrir á jafn litlu svæði. Það hafi tekið hann rúman klukkutíma og þá slasaði hann sig í undirbúningnum. „Já, ég stakk mig tvisvar í augað með tannstöngli,“ segir Frank.

Að sögn Íslandsmeistarans er kærastan sem veldur myndavélinni skilningsrík – að minnsta kosti upp að ákveðnu marki. „Hún horfði reyndar nokkrum sinnum á mig meðan ég var að gera þetta og spurði hvað í andskotanum ég væri að gera, hvað væri eiginlega að mér og fleiri slíkar athugasemdir,“ segir Frank.

Títtnefnt myndband  af metinu má sjá hér að neðan.