Að fá sér hálf-nýjan bíl

Ég hef ákveðið að fá mér nýjan bíl því að 2007 módelið er farið að bila svo oft að það svarar ekki kostnaði að eiga hann og tímatapið sem ég verð fyrir vegna viðgerðanna er ómælt. Þar sem ég hef ekki efni á að fá mér alveg nýjan bíl ætla ég að fá mér hálfnýjan bíl þannig að framhlutinn verði nýr og lúkki vel út en afturhlutinn verði sá gamli áfram. Vinur minn hefur sagt mér að ég sé galinn að láta mér detta þetta í hug en fyrir utan minni fjárútlát get ég ekki hugsað mér að yfirgefa afturhlutann enda klassískt útlit 2007 árgangsins.

Þetta er nokkurn veginn það sem stefnt er að með því að reisa hálfnýjan Landspítala við Hringbraut. Hann myndi lúkka vel út að framan en drattast með meirihluta rúma sinna að aftan í úreltum húsakynnum. Fæðingardeildin yrði áfram í sínu gamla húsnæði í borholufjarlægð frá nýjum skurðdeildum. Öllu yrði klambrað saman með undirgöngum og ranghölum. Áfram þyrfti þungt viðhald húsnæðis og áfram yrði skortur á einangrunarrýmum.

Engan afslátt

Nýr spítali á ekki að vera hálfnýr því að það er ekki ákvörðun sem er tekin til næstu 50-70 ára eins og hún þarf að vera sé tekin full ábyrgð á framtakinu. Fyrir slíka ákvörðun þarf að hugsa stórtækt og gefa engan afslátt af því að byrja út frá bestu forsendum en ekki þeim hálf-bestu. Það er enginn sparnaður í því að spara 1/3 af verði nýs spítala með hálf-lausn og súpa seyðið af dýru viðhaldi, óhagræði, umferðarteppum, skertum gæðum starfseminnar, áframhaldandi óánægju hluta starfsfólks og rýrum stækkunarmöguleikum. Miðbærinn er nú þegar að springa út af hótelum og uppbygging HÍ mun halda áfram og þurfa sitt pláss. Þó að LSH sé háskólasjúkrahús þarf spítalavinna ekki að fara fram í göngufæri við bóknám og kennslu verðandi heilbrigðisstétta.

Stærstu hagsmunamálin eru að það verði byggður alveg nýr spítali og aðgengi akandi umferðar sé eins og best verður á kosið. Afsláttur af þessum kröfum þýðir að hálf-nýr spítali verður úreltur á 20 árum og verður í raun aldrei boðlegur nema að hluta. Raunverulegur sparnaður og þjóðhagkvæmni fæst með algerri endurnýjun og endurhugsun Landspítala háskólasjúkrahúss á besta stað. Það er tími fyrir nýtt.