Býr í borginni hennar Línu langsokks

Eiríkur Nói Einarsson er sex ára og er nýfluttur til Visby á eyjunni Gotlandi við suðausturströnd Svíþjóðar. Skólinn hans er eins og galdraskólinn hans Harry Potter. 

Er gaman að eiga heima í Visby, Eiríkur Nói? „Já, það það er mjög gaman, því það er gaman að flytja. Maður þarf að fara í flugvél og lest og ferju til að komast til Gotlands og ég hafði aldrei áður farið í neitt svoleiðis.“

Hvernig er skólinn þinn? „Ég er í Försteklass í S:t Hansskolan. Hann er eins og galdraskólinn hans Harry Potter og er innan veggjanna í Visby, það eru svona gamlir veggir eins og virki. Í dag var ég að búa til karla úr mjólkur­fernum í skólanum.“

Hvað er best við Svíþjóð? „Að leika við mömmu og hér er líka hægt að fá pasta sem lítur út eins og dekk á bíl. Það er líka vatnsrennibrautagarður hérna í Visby, en hann er lokaður núna. Húsin og göturnar eru öðruvísi hér en heima. Og svo er Lína Langsokkur frá Visby og ég bý í götunni sem nammibúðin var í, í myndinni um Línu.“

Eru krakkarnir öðruvísi í Svíþjóð en á Íslandi? „Já kannski smá. Þeir eru litlir og tala sænsku en skilja samt allt sem ég segi.“

Hvað finnst þér leiðinlegt? „Sko, mamma sagði að hún væri með eitthvað óvænt fyrir mig í gær en svo keypti hún bara fjórar bækur á sænsku og hún er alltaf að kaupa bækur á sænsku þannig að þetta var ekkert óvænt. Ég hefði frekar viljað fá ís eða nammipoka.“

Ef þú mættir vera einhver sögupersóna, hver vildir þú þá helst vera? „Lína Langsokkur. Bara af því hún er svo sterk og hún er með fléttur. Og svo á hún hest og apa og rottu og líka fullt af gulli.“