Einstaklega óvenjulegur þrumugarðaveggur skall á landinu

Þrumuveðrið sem íbúar á suðvesturhorni landsins urðu varir við nú síðdegis var orsök einstaklega óvenjulegs þrumugarðaveggs sem skall á Suður- og Suðvesturströnd landsins á sjötta tímanum í dag. 

Birta Líf Kristinsdóttir, veðurfræðingur á Veðurstofu Íslands, segir óvenjulegt að sjá slíka myndun hér á landi og minnir einkum á veðrið í Bandaríkjunum, þar sé þetta algengari sjón. 

„Helsta skýringin er líklega að landið sé hlýtt eftir síðustu daga og kalda loftið sem kom hér skyndilega úr suðri hefur orsakað þetta ójafnvægi og hleypt öllu í loft upp,” skrifar Birta en öflugar þrumur heyrðust og varð einnig vart við eldingar.

Einstaklega óvenjulegur þrumugarðaveggur skall á S- og SV-ströndinni núna milli kl. 17 og 18 og heyrðust öflugar þrumur...

Posted by Veðurlíf on Friday, October 30, 2015

Vísir sagði frá því á þriðja tímanum í dag að eldingar gætu gert vart við sig á suðvesturhluta landsins síðdegis. Rætt var við Óla Þór Árnason, veðurfræðing á Veðurstofu Íslands, sem sagði spar gefa til kynna að svokallað veltimætti yrði mögulega fremur hátt við suðurströnd landsins seinnipartinn í dag. Veltimætti (CAPE) er mælikvarði á lóðréttan óstöðugleika lofts en eftir því sem loftið er óstöðugra eykst hættan á myndun skúraflóka og við mikinn óstöðugleika er hætta á þrumuveðri. 

„Ég er svolítið spenntur að sjá hvað þetta ætlar að gera hérna seinni partinn við suðurströndina. Það gæti eitthvað gerst hérna á næstu tveimur til fjórum tímum,” sagði Óli Þór og hafði nokkuð til síns máls. 

Þá sagði Vísir einnig frá því að gestir Neslaugarinnar hefðu drifið sig upp úr lauginni á sjötta tímanum í dag eftir að hafa heyrt þrumur og eldingar. 

Tweets about þrumur AND eldingar