Allt til að halda krökkunum á mottunni

Hafrún Anna Sigurbjörnsdóttir viðskiptastjóri gerði sér lítið fyrir og skar út grasker eins og hún hefði aldrei gert annað. Hún birti mynd af graskerinu Facebook og hefur það vakið verulega athygli og hrifningu meðal vina hennar þar. Fyrir utan það hversu vel tókst til þá er eftirtektarvert að Hafrún Anna hefur aldrei fengist við útskurð af neinu tagi; ekki að skera í grasker né nokkuð annað, sé því að skipta.

„Ég var svona rúma tvo tíma að skera þetta út,“ segir Hafrún Anna, sem getur þulið upp ýmsar gráður og titla til að státa af svo sem BA í hagfræði og félagsvísindum frá Bifröst og Markaðs- og alþjóðaviðskipti frá HÍ. „En, nei, ég hef aldrei komið nálægt neinu slíku sem kallast má útskurður. Þetta er fyrsta grasker sem ég sker út.“

En, hvað kom til að hún fór að fást við þetta núna?

„Ég sá þátt eða auglýsingu á netinu þar sem verið var að skera út í þrívídd og fannst það spennandi. Svo á ég börn og vil gleðja þau allan daginn. Ætli það spili ekki inní. Hræða blessuð börnin og halda þeim á mottunni,“ segir Hafrún Anna hlæjandi. En hún á þrjá syni, þar af tvo mjög unga. Og þeim þykir mikið til koma – að sjálfsögðu.

Úti í Bandaríkjunum, þar sem Halloween-tíð, eða Hrekkjavaka, er haldin hátíðleg er rík hefð fyrir því að skera út grasker og þá helst þannig að þau séu sem skelfilegust. Ekki hefur hins vegar farið mikið fyrir slíku á Íslandi, en það virðist vera að breytast. Hafrún Anna segir að hún og fjölskyldan taki þátt í þeim hátíðarhöldum sem fylgja, að hætti Bandaríkjamanna.

„Vinafólk mitt hefur komið upp hefð, sem er að halda mikið hrekkjavökupartí og við erum að fara þangað á dag. Í Garðabæinn. Þar er metnaðarfull móðir sem hefur tekið nokkrar vikur í að skreyta.“