Séreignarsparnaður framlengdur til greiðslu skulda og kaupa á fyrstu íbúð

Bjarni Benediktsson, formaður Sjálfstæðisflokksins, boðar frumvarp um varanlega útfærslu á að fólk geti notað lífeyrissparnað til kaupa á fyrstu íbúð og greiðslutímabilið verði lengt. Þetta sagði Bjarni á landsfundi Sjálfstæðisflokksins í dag.

„Það ætti bara að vera viðvarandi þriggja, jafnvel fimm ára heimild til að taka af séreignarsparnaði sínum fyrir útborgun í  fyrstu íbúð. Þar er ég sem sagt að tala um að afnema þessi tímamörk. Varðandi heimildina til að taka út og greiða inn á lán  af íbúð sem þú ert þegar búinn að kaupa gildir í raun alveg það sama. Við ættum bara að vera með viðvarandi heimild sem þú gætir nýtt í ákveðinn árafjölda í stað þess að láta það bara gilda núna í þessi ár,“ segir Bjarni.

Þannig gæti þetta úrræði mögulega framlengst um tvö ár fyrir þá sem nú þegar eru að nýta það samkvæmt gildandi lögum til þriggja ára.

„Það gæti verið að við færum t.d. upp í fimm ára heimild. Þá myndum við segja; hér er hópur sem nýtt hefur heimildina í þrjú ár og við bætum þá við tveimur. Fyrir aðra og yngri kynslóðir sem eru að koma inn á fasteignamarkaðinn, eða aðra til framtíðar sem ekki hafa nýtt úrræðið, gæti opnast ný fimm ára heimild sem þeir gætu gripið til þegar þeim hentaði,“ segir formaður Sjálfstæðisflokksins.

Bjarni boðar að frumvarp um þessi mál líti dagsins ljós á yfirstandandi þingi.

„Já ég tel að við verðum að fara að veita svör við því hvað á að taka við þegar þetta kerfi sem við erum með núna og gengur vel; við erum að veita hálfan milljarð á mánuði í skattaafslátt fyrir þá sem eru að nota úrræðið og greiða niður skuldir sínar – og við þurfum að svara því hvað á að taka við áður en kerfið hefur runnið sitt skeið,“ segir Bjarni.

Það er mikill hugur í Sjálfstæðismönnum á landsfundinum og fyrir honum liggja fjölmargar tillögur til breytinga í samfélaginu sem nokkur einhugur virðist ríkja um. Flokkurinn mælist hins vegar með eitt minnsta fylgi í sögu sinni um þessar mundir.

Það var talað um það hér í fyrirspurnatíma í spurningu til þín og ykkar ráðherranna, hvort Sjálfstæðisflokkurinn væri grár og gugginn. Hvernig sýnist þér heilsufarið á flokknum miðað við fylgið eins og það er og stöðuna hér á landsfundinum?

„Við höfum verið að mælast rétt undir kjörfylginu frá því síðast. Við höfum verið að sveiflast öðru hvoru megin við 25 prósentin í flestum könnunum. Auðvitað viljum við ná meiri árangri. Við höfum mikinn metnað til þess. Þessi fundur verður okkur mikil vítamínsprauta í framhaldinu. Við komum með sterkar ályktanir, mikinn kraft frá yngri kynslóðinni inn á þennan fund. Mér finnst vera mikil samstaða, gleði og hamingja og bjartsýni hér á fundinum,“ segir Bjarni Benediktsson.