Felldu tillögu SUS: Sameinuð um kynjakvóta

„Ég var líka einu sinni tvítug, ég trúði því að jafnrétti væri innan seilingar. Það væri bara rétt handan við hornið og ég var á móti öllum aðgerðum til að flýta því,“ þetta sagði Páley Borgþórsdóttir lögreglustjóri í Vestmannaeyjum á landsfundi Sjálfstæðisflokksins.

Í ályktun um jöfn tækifæri  var lagt til að: „Öllum hugmyndum um þvingað jafnræði, á borð við kynjakvóta, er hafnað.“ Tillagan tekur undir með sjónarmiðum SUS í fréttum vísis í gær. 

Páley lagði fram breytingartillögu þess efnis að setningin félli úr ályktuninni.

„En síðan eru liðin tuttugu ár og við erum bara staðin í stað. Við erum meira að segja farin aftur á bak. Hjá okkur eru hlutirnir að gerast of hægt. Ég ætla síður en svo að fara að tala fyrir kynjakvótum og fléttulistum en það er ljóst að við þurfum aðgerðir ef við ætlum ekki að bíða eftir því að jafnrétti komi til okkar. Þessi setning sem ég vil að verði felld út gengur of langt og er algjörlega í ósamræmi við það sem komið fram hjá formanni okkar,“ bætti Páley við og tók þar með undir sjónarmið Bjarna Benediktssonar í setningarræðu hans á landsfundi um jafnan rétt kynjanna.

Ungar konur, með Laufey Rún Ketilsdóttir formann Sambands ungra Sjálfstæðismanna í broddi fylkingar, komu í pontu og lýstu þeirri skoðun sinni að það væru vond skilaboð til ungra kvenna að þær þurfi hjálp til að komast áfram í lífinu. Þær komist þangað sem þær vilja á eigin verðleikum.

Illugi Gunnarsson menntamálaráðherra lagði orð í belg og sagði: „Af hverju er ekki jafnrétti í okkar samfélagi? Vegna þess að ekki bara í áratugi, ekki bara í árhundruð heldur í árþúsund hefur staðan verið sú að öðru kyninu hefur verið haldið frá völdum og mismunum hefur verið allan þennan tíma. Það er ekki fyrr en fyrst núna í nútímanum að þessi þróun er að snúast við. Og ekki halda það í eina sekúndu að við séum ekki menguð af þessari sögu. En í ljósi þess að ójafnræðið hefur verið svo mikið og svo lengi þá tel ég að það sé nauðsynlegt að við horfum til þessarar stöðu og höfum það í huga að þessi saga hvílir á okkur.“

Hann tók undir með Páleyju að setningin ætti að fara út. Það fyrirkomulag að óska eftir tveimur einstaklingum af gagnstæðu kyni þegar tilnefnt væri í nefndir ríkisins væri gott og hefði gefist vel. Það þvingaði fólk til að hugleiða jafnrétti og hafa jafn marga af gagnstæðu kyni í nefndum og ráðum ríkisins. 

Tillaga Páleyjar um að fella ætti setninguna út var samþykkt með miklum meirihluta á fundinum. Sjálfstæðisflokkurinn tekur því ekki skýra afstöðu gegn kynjakvótum.