Tók á móti barni í 30.000 fetum á leið úr brúðkaupsferð

Flestir eiga eftirminnilegar brúðkaupsferðir en heimför Angelicu Zen hlýtur að teljast ein sú eftirminnilegasta. Á leið frá Taívan til Los Angeles tók hún nefnilega á móti barni í 30.000 fetum.

Á leiðinni fékk einn farþeganna á fyrsta farrými hríðir og var ekki um annað að ræða en að taka á móti barninu. Ekki var nóg pláss á fyrsta klassa til að athafna sig og því brá Zen á það ráð að koma konunni fyrir á ganginum í almenna farþegarýminu. Flugfreyjurnar voru síðan snöggar að græja handklæði, hanska og allskonar útbúnað til að allt gengi smurt fyrir sig.

„Það var mikill léttir þegar barnið var komið í heiminn og grét,“ segir Zen í samtali við NY Post. Þetta var í fyrsta skipti sem hún tekur á móti barni óstudd.  Zen er læknanemi á fjórða ári og hafði áður tekið á móti tveimur börnum en þá undir handleiðslu annarra. „Venjulega hugsa ég um aldraða sjúklinga þannig þetta var talsvert fyrir utan starfslýsinguna mína.“

Læknaneminn var nýsofnuð en flugið frá Taívan til Los Angeles tekur fjórtán tíma. Í raun var það tengiflug þar sem hún og eiginmaður hennar höfðu varið fyrstu dögum sínum sem hjón. „Hann var tilbúinn í að aðstoða mig en ég ákvað að biðja hann ekki um hjálp. Ég held hann hafi verið of stressaður til þess,“ segir Zen. Flugvélin millilenti í Alaska svo móðir og nýfætt barn gætu komist á spítala.

Myndband af barninu að koma í heiminn má sjá hér að neðan.