Ertu byrjandi á líkamsræktarstöð?

Líkamsræktarstöðvar geta verið óhugnanleg fyrirbæri. Þegar stigið er þangað inn í fyrsta sinn er það líkt og að stíga inn í frumskóg þar sem allir líta út eins og grísk goð og vita nákvæmlega hvað þeir eru að gera með tilheyrandi stunum og grettum. Málið er að allir eru byrjendur einhvern tíma og allir geta stundað líkamsrækt, hvort sem tilgangurinn er að bæta heilsuna, vöðvamassa eða keppa í íþrótt. Opnir hóptímar Þegar maður byrjar í líkamsrækt er gott að fá upplýsingar um hvað sé í boði og yfirleitt er um fjölmargt að velja. Það eru opnir hóptímar á flestum líkamsræktarstöðvum þar sem boðið er upp á fjölbreytta tíma eins og þrek- og þoltíma með dansívafi saman­ber Zumba, styrktartíma þar með lóðum og eigin líkamsþyngd, pilates, jóga, hjólatíma og margt fleira og eru þessir tímar ávallt kenndir undir leiðsögn. Lokuð námskeið Á lokuðum námskeiðum er meira aðhald og stuðningur en fæst með því að fara í hóptímana. Hægt er að velja um fjöldann allan af námskeiðum og flestir ættu að geta fundið eitthvað við sitt hæfi. Það myndast oft skemmtileg stemning á svona námskeiðum þar sem sama fólkið mætir og svitnar og tekur á því saman. Tækjasalurinn Tækjasalurinn er sá hluti líkamsræktarstöðvarinnar sem hræðir flesta. Mörgum finnst eins og allir séu að horfa á sig og fylgist með mistökum manns. Ég vinn á líkamsræktarstöð og ég get sagt ykkur það að það er enginn að pæla í því hvað þú ert að gera, nema þjálfarinn þinn ef þú hefur slíkan en það er það sem hann á að gera. Til að byrja með þá bjóða flestar líkamsræktarstöðvar upp á leiðsögn í tækjasalnum. Þá fer þjálfari með þér yfir hvernig tækin virka, hvar lóðin eru og hvernig þetta gengur fyrir sig og svo er oft boðið upp á æfingaáætlun. Ef þú vilt sérhæfðari þjónustu og treystir þér ekki til þess að gera þetta án stuðnings þá er hægt að kaupa sér einkaþjálfara sem er með þér á æfingu og sér til þess að þú fáir það mesta út úr tímanum, gerir allar æfingar rétt og náir markmiðum. Það er líka fullt af fólki sem getur þetta upp á eigin spýtur og það er frábært. Hvort sem þú hefur áhuga á því að stunda styrktarþjálfun, lyfta lóðum, hlaupa, hjóla eða gera æfingar með eigin líkamsþyngd, þá er best að mæta bara og byrja. Það verður enginn sérfræðingur í fyrsta skipti, ekki í líkamsrækt frekar en í verkfræði. Það sem mér finnst frábært við líkamsræktarstöðvar er að það myndast oft svo skemmtileg stemning. Maður eignast ræktarvini. Margir líkja líkamsræktarstöðvum við félagsmiðstöðvar sem er að mínu mati ekkert nema jákvætt ef maður nær að taka vel á því líka. Þetta þarf nefnilega líka að vera skemmtilegt!