#Lægðin tekin með stæl

Flestir Íslendingar hafa ekki farið varhluta af fyrstu haustlægðinni sem legið hefur sem mara yfir landinu með tilheyrandi sálarstríði, kuldaköstum og fljúgandi trampólínum. Samfélagsmiðlarnir stútfylltust af buguðu fólki í slag við lægðina, allt saman samviskusamlega myllumerkt #lægðin.

Vissara er að klæða sig eftir veðri, en það getur verið þrautin þyngri ætli menn og konur að tolla í tískunni í slíku árferði.

Vísir fór á stúfana og hafði samband við nokkra annálaða tískuspekúlanta sem kunna listina að klæða sig smart, og vera nokkuð hlýtt á meðan haustlægðirnar gefa þeim hvern kinnhestinn á fætur öðrum, og má með sanni segja að útvíðar buxur og yfirstórir jakkar séu vinsæl fyrirbæri í vopnabúrum okkar fólks. 

Ásdís María Viðarsdóttir

söngkona, samkvæmisljón og

starfsmaður Spútnik 

„Ég ætla að segja að kasmírpeysur komi manni ansi langt. Annaðhvort með rúllukraga eða svona djúsí peysur eins og fást til dæmis í Aftur. Útvíðar buxur, hvort sem þær eru léttar eða þungar, jafnvel úr flaueli, eru málið. Svo er upplagt að klæða sig í támjó stígvél. Ég hef alltaf elskað chunky boots á veturna, en nú sé ég bara támjó. Hæglega má svo rústa lægðinni með oversized jakka, með kögri eða svona mokka, og ég myndi segja nauðsyn. Til að toppa þetta allt, þá eru dökkir mattir varalitir æði, brúnir eða berjalitir."

Andri Hrafn Unnarsson

fatahönnuður

„Skyldueign fyrir haustlægðina er regnkápa, og því meira sem brakar í henni því betra! 66°Norður eða Army.is eru með brakandi ferskar kápur. Svo skipta buxurnar miklu máli, alvöru gallabuxur, þar sem gæðin segja til sín. Annars held ég að grátt sé málið, hvort sem er í jakkafötum, gallabuxum, stuttermabolum eða kjólum. Grár tónar vel við haustliti. Allir aukahlutir verða svo stórir, hattar, treflar, töskur. Go bold or go home, eins og þeir segja. Strigaskórnir loka þessu svo, en það er sennilega síðasti sjéns til að sporta strigaskóm án þess að þeir veðrist í klessu. Kannski ekki spánýtt, en á alltaf erindi. Þá kemur Jason Markk, náttúrulegi skóhreinsirinn, til bjargar og heldur skónum ferskum."

Pattra Sriyanonge

lífsstíls- og tískubloggari á Trendnet.is

„Ég segi að áberandi belti verði fyrirferðarmikil í haust. Vígaleg belti með flottum sylgjum, en mikilvægt að hafa í huga að auðvelt er að ofgera þessu trendi, þar sem línan er afskaplega þunn á milli „classy“ og „trashy“. Þá er kjörið að verjast haustlægðum með rúllukrögum. Þeir hafa verið áberandi og halda því áfram, þeir eru líka svo hentugir þar sem þeir eru afar fjölbreyttir og passa nánast við allt og öll tilefni. Svo verða útvíðu buxurnar ansi sjáanlegar, rúskinn, kögur og allur pakkinn. Sjálf hef ég alltaf verið hrifin af þeim, og er því hæstánægð með þessa endurkomu, enda annálaður aðdáandi sjöunda áratugarins. Að lokum ber að nefna þykkan og góðan leðurjakka, en hann er lykileign í fataskápa Íslendinga, enda má klæðast honum allt árið, og svo fara í hann undir frakka þegar lægðin læðist að."

Hlynur James Hákonarson

bloggari á Herratrend.is

„Hausttískan 2015 byggir mikið á retró klæðnaði sjöunda áratugarins, og þá eru menn svolítið að blanda saman nútíma ræktarfatnaði, við svokallað „lounge­wear“ eða kósíföt. Ætli menn sér að komast í gegnum þessar haustlægðir, vel útlítandi, myndi ég segja að stórar yfirhafnir spili lykilhlutverk og þá skiptir miklu máli að þær séu í jarðarlitum. Svo halda einfaldir bolir sér alltaf inni og þykku peysurnar standa fyrir sínu. Stan Smith strigaskórnir verða áfram áberandi."

Lína Birgitta Camilla Sigurðardóttir

tískubloggari og stílisti

„Allan daginn góð rúllukragapeysa og þá helst í jarðlitum. Þær svíkja mann aldrei, og hvað þá í haustlægð. Þær einföldustu geta gert heildarútlitið brjálæðislega töff. Svo myndi ég segja að cape blazerar kæmu sterkir inn með lægðunum, og eru svolítið möst þegar maður ætlar eitthvað fínt. Sjálf var ég búin að leita lengi að slíkum og fór um allt, en datt loks niður á hinn eina sanna í ZARA. Þessi sér um að setja punktinn yfir i-ið, enda mjög smart."