Ræturnar heimsóttar í suðrinu

Hópur landsþekktra tónlistarmanna heimsótti nýlega rætur rytmískrar tónlistar í Mojo þríhyrningnum svokallaða; Nashville, Memphis og New Orleans í Bandaríkjunum. Ferðin var á vegum Félags tónskálda og textahöfunda (FTT) og með í för voru einnig ýmsir tónlistarunnendur ásamt mökum og öðrum fjölskyldumeðlimum. Einn ferðalanganna var Bragi Valdimar Skúlason, meðlimur Baggalúts, en hann segir aðdraganda ferðarinnar megi rekja til vel heppnaðrar ferðar FTT til Liverpool árið 2008 þar sem Hljómar héldu tónleika í Cavern klúbbnum sögufræga.

„Það var því löngu kominn tími á aðra góða ferð. Fyrst heimsóttum við Nashville, vöggu sveitatónlistarinnar. Þar voru ýmsir tónleikastaðir heimsóttir og glóðvolgt köntríið innbyrt. Frægðarhöll sveitatónlistarinnar, Country Music Hall of Fame, var einnig heimsótt og litið var inn í Creative Workshop hljóðverið þar sem rennt var í nýtt lag sem nokkrir ferðafélagar suðu saman á staðnum.“

Gullna hliðinu náð

Næst lá leiðin til Memphis þar sem gist var á hinu fornfræga Heartbreak Hotel, sem er steinsnar frá Graceland, heimili Elvis Presley. „Við fengum sérstakan kvöldtúr um húsið og skoðuðum hvern krók og kima. Við fórum andaktug að eldhúsborði, fataskáp og leiði Elvis. Þess má geta að Björgvin Halldórsson var með í för og ekki skemmdi fyrir að fá leiðsögn hans um helgidóminn.“

Daginn eftir var haldið á fæðingarstað rokksins, Sun Studio, þar sem Elvis hljóðritaði fyrsta lag sitt og skrifaði í framhaldinu fyrstu kafla rokksögunnar ásamt góðu fólki. „Þá var hljóðver Willie Mitchell, Royal Studios, heimsótt. Þar var að sjálfsögðu sett saman tiltæk súpergrúppa og talið í tvö lög. Standa vonir til að þær upptökur nái viðlíka hylli og síðasti risasmellur sem var hljóðritaður þar, Uptown Funk.“

Næst á dagskrá var STAX safnið sem áður var útgáfufyrirtæki sem ruddi frá sér sálartónlistarsmellum á 6. og 7. áratug síðustu aldar. „Það var ekki amalegt að hafa tvo meðlimi Sálarinnar, Stefán Hilmarsson og Guðmund Jónsson, með í för og segja má að Sálin hans Jóns míns hafi loks náð að Gullna hliðinu þarna í Soulsville.“

Hjörtun hreinsuð

Rétt áður en hópurinn kvaddi Tennessee fylkið skaust hann í sunnudagsmessu hjá æðstapresti sálartónlistarinnar, séra Al Green. „Predikarinn var sjálfur á staðnum og hóf upp innblásna raust við undirleik hljómsveitar hússins og söfnuði Green–ista. Mögnuð stund sem hafði mikil áhrif á mannskapinn og hreinsaði hjörtun.“

Þá var brunað niður til Clarksdale í Mississippi sem er eitt höfuðvígi blústónlistarinnar. „Þar fórum við að krossgötunum þar sem Robert Johnson er sterklega grunaður um að hafa átt í sálarviðskiptum við Kölska. Borgarstjórinn og Íslandsgóðkunninginn Bill Luckett tók á móti okkur á Ground Zero blúsklúbbnum sem hann og Morgan Freeman eiga saman. Þar var að sjálfsögðu talið í og munnhörpur og gítarar grétu sáran.“

Að síðustu var brunað niður til Louisiana, í hreiður djassins. „Þar spókaði hópurinn sig um í fótspor Lois Armstrong og fleira mektarfólks í franska fjórðungnum, brá sér í siglingu niður Mississippi fljótið og drakk í sig Bourbon stræti í einum teyg.“

Bragi segir ferðina hafa lukkast stórvel enda eigi svæðið ríka sögu og tónlistarleg sætindi. „Ég held að það sé óhætt að segja að ferðin hafði mikil áhrif á hópinn. Hún var full af furðum og uppátækjum, enda ekki annars að vænta þegar jafn fjölkunnugt og fjöltengt ofurmenni og Jakob Frímann sér um skipulagninguna. Mannskapurinn á örugglega eftir að vinna vel úr þessu öllu saman, a.m.k. á ég eftir að dusta rykið af rafmagnsgítarnum og ræða þetta aðeins nánar við hann í góðu tómi.“