Það þarf ekki alltaf að skjóta í sig einum öl til að bresta í dans

„Ég er bara búinn að vera hérna að fara fram og til baka til að reyna að koma auga á aukapláss til að koma fleirum fyrir,“ segir Tómas Ó. Eiríksson, sem stendur fyrir Yoga Moves í Hörpu í kvöld. Fyrir löngu er orðið uppselt á viðburðinn, en alls komast eitt hundrað manns fyrir á háaloftinu.

„Við erum að blanda saman jóga og tónlist, og það hefur alveg sýnt sig að innst inni langar okkur öll að dansa. Við Íslendingar höfum dálítið týnt danskúltúrnum okkar, en það er stutt í hann,“ útskýrir Tómas og bendir á að við þurfum í eðli okkar ekki að skjóta í okkur einum eða tveimur köldum áður en hægt sé að bresta í dans.

Segir Tómas Yoga Moves ekki aðeins blanda saman lifandi tónlist, jóga, dansi og hugleiðslu, heldur einnig kynslóðum. „Við höfum verið að fá til okkar fólk frá fimm ára aldri upp í sextíu og fimm ára, og allir gleyma sér í dansinum. Það er eitthvað við það að vera saman í rými, og þurfa ekki að tala. Að fá að vera bara í tengingu án þess að fylla rýmið af orðum og fá bara að vera í líkamanum. Hér tala allir sama tungumálið, en segja ekki orð.“



Fyrir þá sem ekki náðu að tryggja sér miða í Hörpu í kvöld, bendir Tómas á að Yoga Moves standi fyrir tímum á Dansverkstæðinu öll fimmtudagskvöld, þar sem vinsælustu plötusnúðar landsins líti við og spili tónlist. Hægt er að nálgast frekari upplýsingar á yogamoves.is.