Rúmlega þrjátíu fermetra stúdíóíbúð til sölu á tuttugu milljónir

Fasteignasala Reykjavíkur er með á söluskrá vel staðsetta 33 fermetra stúdíó íbúð í risi í litlu fjölbýli á eftirsóttum stað í Vesturbænum. Ásett verð er 19,9 milljónir króna eða um 600 þúsund krónur fyrir hvern fermetra.

Í lýsingu fasteignarsölunnar segir að gólfflöturinn sé þó nokkuð stærri og samanstendur eignin af eldhúskrók, stofu/herbergi, baðherbergi með tengi fyrir þvottavél og geymslurými. Góðar hirslur eru undir súð og nýtist hver fermetri.

Gengið er upp sameiginlega teppalagðan stiga með fallegu viðarhandriði. Þaðan er komið er inn í parketlagt rými með góðri lofthæð. Þar er eldhúskrókur og stofa/herbergi með góðu hilluplássi undir súð. Baðherbergi er ágætt með nettum vaskaskáp, hillum undir súð, þakglugga, baðkari, dúk á gólfi og tengi fyrir þvottavél.