Innlent

Velferðarráðherra vill ekki setja hámarkstölu á fjölda flóttafólks til Íslands

Nanna Elísa Jakobsdóttir skrifar

„Til þess að þetta geti gengið vel eftir þá þurfum við hjálp. Það er fólk á Íslandi núna sem hefur fengið stöðu flóttafólks og þarf hjálp. Ég hvet fólk til að hafa samband við velferðarráðuneytið og Rauða krossinn og spyrja hvað það geti gert til þess að hjálpa. Fólk þarf að fá vinnu, húsnæði, föt og til dæmis aðstoð við að læra á hvernig bankakerfið virkar.“

Þetta sagði Eygló Harðardóttir velferðarráðherra í Sprengisandi í morgun þar sem hún ræddi flóttamannavandann og þátttöku Íslendinga við þáttastjórnanda Sigurjón M. Egilsson.

Stuðningurinn frá Íslendingum hvatning
Eygló fagnaði því að sveitarfélög landsins skyldu bregðast svo vel við því að taka við fleiri flóttamönnum. Hún segist hafa haft áhyggjur af því að viðbrögðin yrðu dræm. Þá þakkaði hún Helga Hrafni Gunnlaugssyni, þingmanni Pírata, fyrir að hafa svarað neikvæðum röddum þegar fregnir bárust af því að Ísland hefði samþykkt að taka á móti fimmtíu flóttamönnum. Helgi Hrafn sagði við það tilefni það fullkomna þvælu að hafna flóttamönnum úr stríði á þeim forsendum að á Íslandi eigi íbúar sárt um að binda.

Helgi Hrafn Gunnarsson, þingflokksformaður Pírata, styður það að Ísland taki við flóttafólki af mannúðarsjónarmiðum og efnahagslegum. Vísir/Samsett

„Fyrst verð ég að segja það við háttvirta kommentara, að mér er algerlega fyrirmunað að sýna fólki samúð fyrir að eiga bágt á Íslandi, sem sýnir því ekki skilning að bjarga fólki frá stríði. Það eru meiriháttar forréttindi að hafa áhyggjur af afkomu sinni á Íslandi miðað við þær aðstæður sem þetta fólk flýr, já, líka fyrir öryrkja, aldraða, fanga, alla á Íslandi. Ég ætla ekki að lýsa því hvað gerist í stríði en fólk mætti hugsa sig tvisvar um áður en það byrjar að vorkenna sjálfu sér fyrir það að yfirvöld ætli að bjarga 50 manns frá mestu harmleikjum sem mannkynið þekkir.“

Sjá einnig: Pírati skilur ekki þá sem vilja hafna flóttafólki

Eygló segir þennan stuðning þjóðarinnar hafa verið hvati og stuðningur til að geta gert betur og boðið enn fleiri flóttamönnum hæli hér á landi.

Flóttafólk vill leggja sitt af mörkum til samfélagsins
Velferðarráðherrann segir ríkisstjórnina vera að fara yfir málið hvað varðar fjölda flóttamanna. Hún segist ekki vilja segja hvort fyrrnefnd tala verði tífölduð eða tvöfölduð vegna þess að hún vildi ekki setja neitt hámark á fjölda þeirra sem við tökum við. Það velti allt á því hversu mikla aðstoð hinn almenni borgari í landinu er tilbúinn til að veita hópnum og ríkisvaldinu.

„En er nægur peningur í landinu til að aðstoða allt þetta fólk?“ spurði þáttastjórnandi.

Eygló sagði það hafa sýnt sig að ef samfélagið okkar tekur vel á móti þessu fólki, haldi vel utan um það og veiti þeim þá aðstoð sem það þarf: „Þá skilar það svo sannarlega sínu til samfélagsins. Og það vill gera það.“

Sava og Nedeljka Ostojic hafa búið á Íslandi síðastliðinn 12 ár. Þegar þau komu til Íslands, með tólf ára son sinn, höfðu þau búið í flóttamannabúðum í sjö ár. Fréttablaðið/Völundur Jónsson

Ísland hefur tekið á móti fleiri flóttamönnum það sem af er kjörtímabili núna heldur en allt kjörtímabilið í fyrra af þeim tölum sem Eygló hefur undir höndum að dæma. Hún segir stjórnvöld nú jafnframt hafa horft til hópa sem aðrar þjóðir vilja ekki taka við.

„Ég tók ákvörðun um að horfa til hinsegin fólks til dæmis. Því miður eru gífurlegir fordómar í öðrum landi gagnvart hinsegin fólki, transfólki og þetta fólk hefur þurft að þola líkamsárásir í flóttamananbúðum. Það hefur gengið mjög vel að taka á móti þessum einstaklingum og ég vil gjarnan halda því áfram.“

„Við sjáum það bara eins og í viðtalinu í Fréttablaðinu um helgina að þegar við gerum þetta vel, tryggjum fólki vinnu og húsnæði hvað við getum breytt lífi einstaklings með því sem við erum að gera.“  Í viðtalinu var talað við Sava og Nedeljka Ostojic sem komu hingað til lands árið 2003 ásamt 12 ára syni sínum, Sasa. Sasa hafði þá lifað meirihluta ævi sinnar á hrakhólum í flóttamannabúðum.


Tengdar fréttir

Vorum án lands

Nedeljka og Sava Ostojic komu til Íslands árið 2003 sem flóttamenn eftir að hafa búið í flóttamannabúðum í Króatíu í 7 ár. Á einu ári söfnuðu þau sér fyrir útborgun í íbúð og líður vel á Ísland. Hinsvegar sakna þau sumarsins



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.