Segir ályktun ætlað að tryggja mannréttindi jaðarhóps

Formaður Íslandsdeildar Amnesty International segir nýsamþykkta tillögu um afglæpavæðingu vændis á heimsþingi samtakanna miða að því að tryggja mannréttindi þeirra sem starfa við vændi. Umræðan um málið sé hér á villigötum.

Tillagan sem samþykkt var í gær hefur verið harðlega gagnrýnd. Meðal annars segir formaður Kvenréttindafélags Íslands í Fréttablaðinu í dag að með þessu sé Amnesty byrjað að skipuleggja eigin jarðarför. Forsvarsmenn Amnesty hér á landi segja hinsvegar misskilning gæta í fjölmiðlum um efni tillögunnar og að umræðan sé á villigötum.

„Í henni felst að Amnesty hefur nú tekið þá afstöðu að samtökin eru andvíg því að það sé gert refsivert að stunda vændi. Sömuleiðis, önnur lög sem að refsa mönnum fyrir að stunda þessa iðju eða vera í þessari starfsemi, það er einnig löggjöf sem við leggjumst gegn,“ segir Hörður Helgi Helgason, formaður Íslandsdeildar Amnesty International.

Sátu hjá

Íslandsdeild samtakanna sat hjá við atkvæðagreiðslu um tillöguna en Hörður segir engin áform um að leggjast einhvers konar baráttu fyrir þessari stefnu hér á landi.

„Hún er tekin á alþjóðavísu og er tekin með liðlega 180 atkvæðum í gær á heimsþingi okkar. Henni er ætlað aðallega að horfa til ástands í öðrum löndum heldur en á Íslandi.“ Rökin á bakvið tillöguna segir Hörður að séu að Amnesty hafi árum saman barist fyrir því að tryggja mannréttindi þeirra sem að eru í vændisiðnaðinum, hjálpa einstaklingum að komast út úr honum og koma í veg fyrir fólk leiðist út í hann.“

„Þeirra mannréttindi þarf að horfa til og þessari stefnu er ætlað að horfa til þess hvernig hægt er að tryggja þau með bestum hætti. Afstaða samtakana er þá sú að það tryggi það ekki að leggja refsingu við iðjunni eða iðnaðinum.“

Ekki vör við fleiri úrsagnir

Hörður segir að Íslandsdeildin hafi ekki orðið vör við að sérstaklega margir hafi sagt sig úr samtökunum en áður. Nokkur umræða hefur verið um úrsagnir vegna stefnunnar.

Sjá einnig: Amnesty International samþykkir ályktun um afglæpavæðingu vændis

Í ályktun Amnesty segir að einstaklingar í kynlífsiðnaði séu mikill jaðarhópur sem í flestum tilvikum eigi á hættu að verða fyrir mismunun, ofbeldi og misbeitingu. Sjö kvennasamtök á Íslandi höfðu skorað á Íslandsdeild Amnesty International að beita sér af alefli fyrir því að tillaga alþjóðahreyfingar Amnesty um að gefa vændi frjálst verði felld.

Talskona Stígamóta sagði í kvöldfréttum Stöðvar 2 í gær að kvennasamtök víða um heim loguðu vegna niðurstöðunnar og að þegar stefni í fjöldaúrsagnir úr samtökunum.

„Ég held að Amnesty þurfi sjált að meta það hvaða áhrif þetta muni hafa á þeirra starf. Það tók okkur 10 ár að koma á þeim lögum sem eru í gildi á Íslandi. Við munum vera trúar sannfæringu okkar og gera það sem við getum til að farið verði með vændi eins og okkur finnst rétt að gert sé,“ sagði Guðrún Jónsdóttir, framkvæmdastýra Stígamóta í gær.