Myndbandsbloggari stökk af Tower Bridge: „Heppinn að sleppa lifandi“

Breskur myndbandsbloggari hefur viðurkennt að hann sé heppinn að hafa sloppið lifandi eftir að hann stökk niður í ána Thames af Tower Bridge í London.

Hinn sautján ára Shah Faisal Shinwari segist hafa stokkið eftir að vinur hans skoraði á hann að gera það til að hann gæti tekist á við lofthræðslu sína.

Shinwari hvetur fólk eindregið að leika þetta ekki eftir.

Á myndbandinu má sjá Shinwari á brúnni þar sem hann býr sig undir að stökkva á meðan myndatökumaðurinn hvetur hann áfram. Síðar má sjá hvernig stökkið mistekst og hann lendir í ánni með höfuðið fyrst.

Shinwari fer svo niður straumharða ána eftir að hafa gleypt óhreint vatn og á í mestu vandræðum með að komast að og upp á bakkann. Einnig sést hvernig sjúkralið hlúir að Shinwari eftir að honum var bjargað upp á bakkann.

Að lokum má heyra Shinwari segja að þetta sé það „vitlausasta“ sem hann hafi nokkurn tímann gert.