Heldur því fram að hann hafi ekki vitað að hann væri með HIV

Guðmundína Ragnarsdóttir, lögmaður nígeríska hælisleitandans sem grunaður er um að hafa smitað konur vísvitandi af HIV með því að hafa haft við þær óvarin mök, segir að maðurinn haldi því fram að hann hafi ekki vitað að hann væri með veiruna.

Hún vill ekki tjá sig um hversu margar konur eru smitaðar eftir manninn en Fréttablaðið greindi frá því í morgun að ein kona væri smituð og að á annan tug kvenna væru mögulega smitaðar.

 

Maðurinn var úrskurðaður í fjögurra vikna gæsluvarðhald í gær en Guðmundína kærði þann úrskurð í dag til Hæstaréttar.

Aðspurð kveðst Guðmundína ekki vita hvar hælisumsókn mannsins er í kerfinu, annað en það að hana eigi að taka fyrir annað hvort í ágúst eða september.