Alþingi hefur samþykkt frumvarp ríkisstjórnarinnar og sett lög á verkfallsaðgerðir BHM og Félag íslenskra hjúkrunarfræðinga. Frumvarpið var samþykkt með 30 atkvæðum gegn 19, en fjórtán þingmenn voru fjarverandi. Verkföllum félaganna er því lokið.
Sjá má atkvæðagreiðsluna hér á vef Alþingis. Alþingi felldi breytingartillögu minnihlutans Allsherjar og menntamálanefndar, sem og tillögu um að málinu yrði vísað frá.
Lögin fela í sér að hafi deiluaðilar ekki komist að samkomulagi fyrir þann 1. júlí mun Hæstiréttur Íslands tilnefna gerðadóm. Hann mun ákveða kjör og kaup félagasmanna BHM og FÍH fyrir 15. ágúst.
BHM hefur nú verið í tæplega ellefu vikna verkfalli og hjúkrunarfræðingar í á þriðju viku.
Umdeild lagasetning
Sigurður Ingi Jóhannesson, sjávarútvegs- og landbúnaðarráðherra, mælti fyrir lögunum. Hann sagði að alltaf væri erfitt og þungbært að setja lög á verkföll. Engu síður væri staðan grafalvarleg. „Því er það mat ríkisstjórnarinnar að það sé nauðsynlegt að taka á þessu máli.“
Hann sagði að þeir sem að væru á móti lagasetningunni bæru ábyrgð á því að ástandið sem uppi væri í samfélaginu myndi halda áfram óbreytt. Þeir sem segðu já myndu höggva á hnútinn og gefa samningsaðilum tækifæri til að finna lausn á næstu tveimur til þremur vikum.
Birgitta Jónsdóttir, kapteinn Pírata, sagði þingmenn Pírata skora á meirihlutann að vísa málinu frá, en tók fram að að sjálfsögðu yrði nú ekki farið eftir því. Hún sagði að breytingartillögurnar hefðu gert „þessi ólög, aðeins skárri.“
Ögmundur Jónasson sagði Vinstri græna harma þessar málalyktir og að frumvarpið væri ranglátt og óskynsamlegt. Hann væri hins vegar sannfærður um að löng barátta og þær miklu fórnir sem heilbrigðisstarfsfólk hefði fært, muni skila árangri þegar upp er staðið. Hann sagði deilunni ekki lokið með lagasetningunni.
Jón Þór Ólafsson, þingmaður Pírata, sagði Landlækni hafa bent ríkisstjórninni á að hættuástand sé á Landspítalanum og að ríkisstjórnin hefði setið á því í „heilan mánuð.“ Hann sagði einnig að bent hefði verið á að leysa þyrfti deiluna og það að ná samningum væru eina langtímalausnin. „Þessi ríkisstjórn forgangsraðar ekki skattfé landsmanna í fyrsta flokks heilbrigðiskerfi.
Unnur Brá Konráðsdóttir, þingkona Sjálfstæðisflokksins, samningaviðræður vera komnar í þann hnút að grípa þurfi inni í.
Lög um verkföll samþykkt
Tengdar fréttir
Hjúkrunarfræðingar segja upp og fara
Hjúkrunarfræðingar segja stjórnvöld senda þeim fingurinn með fyrirhugaðri lagasetningu á verkfall. Mikill fjöldi hyggst segja starfi sínu lausu. Börn og makar fylgja hjúkrunarfræðingum sem ætla að leita nýrra starfa í nágrannalöndunum.
„Bann við verkfalli á tvímælalaust rétt á sér“
Meirihluti allsherjar- og menntamálanefndar leggur til að verkfallsfrumvarp ríkisstjórnarinnar verði samþykkt.
Minnihluti allsherjar- og menntamálanefndar vill verkfallsfrumvarp burt
Telur hann ekki sýnt að fullreynt hafi verið að ná samningum með eðlilegum hætti við félögin og mótmælir "óhæfilegum flýti á meðferð málsins“.
Hjúkrunarfræðingar segja upp, reiðar köldum kveðjum
Hjúkrunarfræðingar létu sig ekki vanta þegar fundur hófst á Alþingi korter í fjögur til að fylgjast með annarri umræðu um frumvarp ríkisstjórnarinnar um lagasetningu á verkfall BHM og Félag íslenskra hjúkrunarfræðinga. Þær Edda Jörundsdóttir og Hildur Dís Kristinsdóttir ætla að segja starfi sínu lausu. Edda hefur starfað við hjúkrun í fimmtán ár og Hildur Dís í sex ár.
Kennarasambandið styrkir BHM um 15 milljónir
"KÍ mótmælir þeim seinagangi og skilningsleysi sem ríkið hefur sýnt af sér í samningaviðræðum við BHM undanfarna mánuði."
Róstusamt í ræðustólnum
Athygli vakti að landbúnaðar- og sjávarútvegsráðherra skyldi hafa flutt frumvarp um bann á verkföll BHM og hjúkrunarfræðinga í stað forsætisráðherra. Frumvarpið verður að öllum líkindum afgreitt í dag.
