„Ég er Lekamaðurinn. Óknyttastrákur og eineltispési“

„Ég hef ætlað að skrifa þetta bréf mjög lengi en aldrei látið verða af því. En nú er kominn tími til að þú fáir að heyra sannleikann. Við þekkjumst ekki neitt en þú afgreiddir mig stundum þegar þú varst að vinna í 10/11 við Hverfisgötu. Ég horfði aldrei í augun á þér enda var ég þjakaður af samviskubiti.“

Svona hefst pistill Hauks Viðars Alfreðssonar í Fréttablaðinu í dag. Þar játar hann að hafa klippt saman bút úr þættinum Bandið hans Bubba, myndskeið sem nánast allir Íslendingar hafa séð.

„Nokkrum árum áður hafðir þú tekið þátt í söngkeppni í sjónvarpi. Það krefst hugrekkis og ég get vel ímyndað mér að stressið geti borið mann ofurliði. Fagmenn í sófa á móti sviðinu og öll þjóðin heima í stofu. Allir að horfa á mann og dæma. En ég man ekki eftir flutningnum þínum vegna þess sem gerðist næst. Björn Jörundur var nokkuð ánægður og áhorfendur klöppuðu fyrir þér. Unnur Birna tók þig tali. „Jæja Villi. Hvernig líður þér eftir flutninginn?“

Haukur Viðar setti myndbrotið inn á Youtube og hefur það verið skoðað yfir tvö hundruð þúsund sinnum. Svarið frá Vilhjálmi Erni Hallgrímssyni var nefnilega „mibbilihábbiliáblabala”.

„Svarið var svo fullkomið að ég hreinlega varð að hnupla þættinum af skráarskiptisíðu. Finna réttan bút, klippa hann út og snyrta. Lúppa. Hægja á. Hægja meira á. Allar hundakúnstirnar. Fyrst var þetta aðeins til heimilis- og einkanota en einhverjum mánuðum síðar ákvað ég að deila þessu með umheiminum,“ skrifar Haukur. Hann segist vita það núna að þetta hafi verið illa gert.

„Smá glappaskot sem fáir höfðu tekið eftir og var löngu gleymt gekk nú manna á milli í netheimum og allir hlógu saman á þinn kostnað. Fæst okkar hefðu samt sjálf getað komið upp stunu við þessar þrúgandi aðstæður, hvað þá heilu „mibbilihábbiliáblabala“. Í viðtali um daginn sagðirðu að þig grunaði vini þína um að hafa lekið myndbandinu. Það er ekki rétt. Ég er Lekamaðurinn. Óknyttastrákur og eineltispési sem þú þekkir ekki neitt. Sorrí með þetta, elsku Villi minn.“

Haukur endar á því að segja: „Þú getur samt huggað þig við að ég mun örugglega fá þetta borgað einhvern daginn. Karma sér nefnilega um sína.“

Haukur Viðar var sjálfur tekinn í gegn á dögunum. Þá eftir að hann lagði sig eftir hádegismat á auglýsingastofunni Brandenburg.

Sjá einnig: Vinnustaðastríðni tekin alla leið

Myndir af Hauki Viðari eru komnar út um allan heima og stærstu miðlarnir hafa fjallað um hann. Þar má nefna Daily Mail, Reddit og í þættinum Good Morning America en myndband af þeirri umfjöllun er hér að neðan.

ABC US News | World News