Borgarfulltrúi Framsóknarflokksins vandar mótmælendum ekki kveðjurnar

Margir deila um mótmælin sem boðað hefur verið til á Austurvelli í Reykjavík á þjóðhátíðardegi Íslendinga sem er á morgun en yfirskrift þeirra er: „Ríkisstjórnina burt – Vér mótmælum öll“ og hafa þrjú þúsund og tvö hundruð manns boðað komu sína.

Einn þeirra sem hefur beðið mótmælendur um að óvirða ekki hátíðisdag þjóðarinnar er Gunnlaugur Ingvarsson, stjórnarmaður í samtökunum Heimsýn.

„Ríkisstjórn var lýðræðislega kosinn til valda. Stjórnarflokkarnir eru með sterkan þingmeirhluta sem var lýðræðislega kosinn af meirhluta kjósenda í lögbundnum og löglegum kosningum almennings. Fyrrverandi ríkisstjórn vinstri flokkanna var beinlínis kosinn burt. Sættið ykkur við það og gefið réttkjörnum stjórnvöldum ráðrúm og frið til þess að framfylgja stefnumálum sínum og þar með framgangi lýðræðisins. Ykkar tími til að ná völdum kemur kannski aftur eftir tvö ár en hann er ekki núna. Síðasta Ríkisstjórn setti líka lög sem bönnuðu verkföll og það eftir aðeins nokkurra daga verkfall flugvirkja. Vinsamlega virðið lýðræðið!,“ skrifar Gunnlaugur á síðuna.

„Er þessu fólki alveg nákvæmlega sama um börnin?“

Borgarfulltrúi Framsóknar og flugvallarvina, Guðfinna Jóhanna Guðmundsdóttir, er ekki hrifin af þessum boðuðu mótmælum og spyr á Facebook-síðu sinni hvað sé eiginlega að fólki sem ætlar að mótmæla 17. júní á Austurvelli. „Er þessu fólki alveg nákvæmlega sama um börnin sem eru að skemmta sér þennan dag. Vona að þetta fólk geti rifið hausinn út úr rassgatinu á sér bara þennan eina dag.“

Vonar að fólk muni hvíla sig frá reiðinni

Þá kallar Kolbrún Bergþórsdóttir, annar af ritstjórum DV, eftir þjóðhátíðardegi án reiði í leiðara blaðsins í dag. „Fram að þessu hefur ríkt þegjandi samkomulag í íslensku þjóðfélagi að efna ekki til ófriðar á þessum hátíðisdegi. Sárafáir hafa orðið til að rjúfa það samkomulag en þegar það hefur gerst hafa mótmælaraddirnar týnst í gleðinni sem þjóðin finnur á þessum degi,“ skrifar Kolbrún sem segir það vefjast sennilega fyrir mörgum að magna upp reiði innra með sér á degi þegar lög eins og þjóðsöngurinn og Hver á sér fegra föðurland? eru sungin.

„Vonandi mun þjóðin hvíla sig frá reiðinni á þjóðhátíðardaginn og sama gleði vera við völd nú í ár eins og síðustu áratugi.“

„Lýðræðið er ekki aðeins á fjögurra ára fresti“

Á viðburðasíðu mótmælanna á Facebook eru tíndar til ástæður fyrir mótmælunum en á meðal þeirra er ákvörðun ríkisstjórnarinnar að setja lög á verkföll BHM og Félags íslenskra hjúkrunarfræðinga. „Þau lækka skatta og gjöld á útgerðina á meðan þau fullyrða að ekki séu til peningar í túlkasjóð heyrnarlausra. Ríkisstjórnin hefur gengið á bak orða sinna margoft og svikið hvert kosningaloforðið á fætur öðru. Stjórnvöld hafa vanrækt skyldur sínar gagnvart þeim sem minna mega sín, fátækum, heimilslausum og öldruðum. Lýðræði er ekki aðeins á fjögurra ára fresti, ríkisstjórnin starfar ekki í umboði fólksins í landinu.“