Jóhannes Valgeirs: Menn eru skammaðir eins og hundar

Jóhannes Valgeirsson, fyrrverandi milliríkjadómari, fór hörðum orðum um dómaranefnd KSÍ og formann hennar, Gylfa Þór Orrason, í samtali við Hjört Hjartarson í útvarpsþættinum Akraborginni í dag.

Dómgæslan í Pepsi-deildinni hefur verið mikil til umræðu í sumar, nú síðast eftir að 8. umferð deildarinnar lauk í gær en óhætt er að segja að umræðan um störf þeirra hafi verið nokkuð neikvæð og ekki að ástæðulausu.

„Mér finnst dómgæslan, af því sem ég hef séð, ekki hafa verið almennt slök. Margir leikir hafa verið fínt dæmdir,“ sagði Jóhannes.

„En það hafa komið upp furðulega skrítin atvik sem eru oft á tíðum algjörlega úr karakter hjá dómurunum. Ég hef spurt mig hvað er að því við eigum góða og reynda dómara og aðstoðardómara. Af hverju lenda menn í svona atvikum sem eru alveg óútskýranleg?

„Eina sem mér finnst, og ég horfi jafnmikið á dómarana og leikinn, að dómurunum líði ekki vel á vellinum,“ sagði Jóhannes sem telur að skortur á sjálfstrausti hrjái dómarana.

„Ef dómarunum líður ekki vel er hætta á vandamálum. Mér heyrist og sýnist að mönnum líði ekki vel - að það séu vandamál sem í gangi í dómarahópnum.

„Ég veit, og menn hafa sagt mér það, að mönnum líður ekki vel með þann stjórnunarstíl sem er viðhafður hjá dómaranefnd KSÍ,“ sagði Jóhannes sem var beðinn um að skýra mál sitt frekar.

„Fyrir nokkrum árum var þessu breytt í einn hóp þar sem menn geta valið hvern sem er. Áður voru A-, B- og C-hópar. Í dag getur dómaranefndin bara ákveðið: þessi er nógu góður, við látum hann prófa 1. deildina eða Pepsi-deildina.

„Þeir eru nánast eins og stjórn í fyrirtæki sem þarf að halda utan um sitt lið. Ef það kemur upp vandamál er það þeirra að ræða hlutina og leysa úr þeim.

„Það er einfaldlega þannig að dómaranefnd KSÍ, undir forystu Gylfa (Þórs Orrasonar), hefur stjórnað með hræðslu- og hótunaráróðri undanfarin ár.“

Jóhannes hefur undanfarin fjögur ár átt í útistöðum við dómaranefnd KSÍ eftir að hann gagnrýndi störf hennar opinberlega. Af þeim sökum hefur Jóhannes ekkert dæmt síðan þá.

„Þegar mitt mál kom upp bað ég um fund þar sem fjórir, frekar en fimm, menn sátu á móti mér hinum megin við borðið. Í annarri setningu á fundinum sagði Gylfi að dómaranefndin væri ekkert að fara að skipta um skoðun í þessu máli,“ sagði Jóhannes sem spurði af hverju hann væri þá að koma alla leið frá Akureyri, þar sem hann er búsettur, fyrst dómaranefndin væri búin að mynda sér skoðun í málinu.

„Ég veit um fjöldamörg dæmi þess þegar menn eru kallaðir á fund þegar eitthvað kemur upp á og það sitja 2-4 menn á móti einum og skamma hann eins og hund. Þetta fer rosalega illa í menn. Þetta er stjórnunarstíll sem viðgengst hvergi,“ sagði Jóhannes og bætti því við að þetta hefði að sjálfsögðu áhrif á frammistöðu dómaranna inni á vellinum.

Jóhannes sagði ennfremur að kollegum hans í dómarastéttinni á Íslandi hafi verið hótað sömu meðferð og hann sjálfur fékk á sínum tíma.

„Ég hef það fyrir satt að það hafi verið sagt við menn: þið vitið hvernig fór fyrir Jóa Valgeirs,“ sagði Jóhannes sem bíður enn eftir að ná sáttum við dómaranefndina og Gylfa Þór Orrason sem var náinn vinur hans áður en þeim sinnaðist fyrir fjórum árum.

„Annað hvort þarf að breyta hugarfarinu og vinnubrögðunum eða það þarf að koma nýtt fólk inn í dómaranefndina. Það sjá allir að það eru vandamál í gang.

„En við þurfum að hafa það í huga að Gylfi er einn af bestu dómurum sem við höfum átt og hann kann leikinn. En mannleg samskipti hjá Gylfa, sem var fjölskylduvinur á mínu heimili áður en þetta gerðist og gisti oft heima hjá mér, eru ekki í lagi. Ef það er ekki hægt að setjast niður og ræða málin er eitthvað mikið að,“ sagði Jóhannes að lokum.