Íslenski boltinn

Bikarþreyta Blika ræður úrslitunum

Eiríkur Stefán Ásgeirsson skrifar
Kristinn Jónsson hefur verið einn besti leikmaður Pepsi-deildarinnar í sumar.
Kristinn Jónsson hefur verið einn besti leikmaður Pepsi-deildarinnar í sumar. vísir/stefán

Það eru tveir stórslagir í næstu umferð Pepsi-deildar karla. Topplið FH, sem á flesta sigra (6) allra liða á tímabilinu, tekur á móti Breiðabliki – eina taplausa liði deildarinnar – á Kaplakrikavelli annað kvöld. Á mánudagskvöld mætast svo Íslandsmeistarar Stjörnunnar og bikarmeistarar KR.

Við beinum sjónum okkar nú að fyrrnefnda leiknum en Hjörvar Hafliðason, einn sérfræðinga Pepsi-markanna, segir að þrátt fyrir mikinn styrkleika liðanna séu vankantar á þeim báðum.

„FH-ingar hafa verið að leka inn mörkum,“ segir hann og bendir á að aðeins einu sinni [gegn Víkingi] hefur FH haldið hreinu síðan liðið vann Val, 2-0, í annarri umferð þann 10. maí.

„Það hefur verið áhyggjuefni fyrir Heimi Guðjónsson [þjálfara FH]. En hann ætti nú, loksins, að geta stillt upp sínu besta miðvarðapari,“ segir Hjörvar, sem reiknar með því að Guðmann Þórisson, sem spilaði í 90 mínútur þegar FH vann Grindavík í bikarnum á fimmtudag, sé orðinn góður af meiðslum sínum og spili með Kassim Doumbia í hjarta varnar FH.

Byrjunarliðið eins og jólasería
Arnar Grétarsson hefur ekki haft ríka ástæðu til að breyta byrjunarliði Breiðabliks. Liðið hefur unnið fimm deildarleiki í röð.

„Við sáum það í bikarleiknum gegn KA að þeir ráða ekki við breytingar,“ segir Hjörvar en Arnar tefldi fram breyttu byrjunarliði gegn KA í bikarnum á fimmtudag og laut þá í lægra haldi í framlengdum leik.

„Byrjunarlið Breiðabliks er eins og jólasería. Ef það vantar eina peru þá er allt saman ónýtt,“ segir Hjörvar og bætir við að úrslit leiksins muni líklega ráðast af því hversu þreyttir Blikarnir verða eftir að margir þeirra spiluðu 120 mínútur í bikarnum á fimmtudag.

„Við sáum hvað gerðist þegar Stjarnan og Leiknir fóru í framlengingu í 32-liða úrslitum bikarsins. Bæði lið voru bensínlaus í næsta leik,“ segir Hjörvar. „Ég held því að óvissuþátturinn, sem gæti haft mikið að segja um leikinn, sé hversu mikil þreyta sitji í liði Breiðabliks.“

Félagaskipti Kristjáns Flóka voru mikið í umræðunni í vetur. vísir/ernir

Hliðarsaga Kristjáns Flóka
Kristján Flóki Finnbogason verður væntanlega í stóru hlutverki í sóknarlínu FH en félagaskipti hans í félagið frá FCK í Danmörku á vormánuðum vöktu mikla athygli.

„Mál Kristjáns Flóka er skemmtileg hliðarsaga í þessum leik. Hann var á leiðinni í Breiðablik þegar hann hætti við á síðustu stundu og mamma hans ákvað svo að skrifa undir fyrir hann hjá FH,“ segir Hjörvar.

„Kristján Flóki hefur staðið sig ágætlega þrátt fyrir að hafa skorað í aðeins tveimur leikjum af níu í deild og bikar í sumar.“

Hjörvar á von á að Heimir Guðjónsson stilli þeim Steven Lennon og Kristjáni Flóka saman upp í sóknarlínu FH en eins og fjallað var um í Fréttablaðinu í gær eru þeir fyrsta framherjaparið í efstu deild undanfarinn áratug þar sem báðir aðilar afreka að skora þrennu á sama tímabilinu. Síðast gerðist það hjá Allan Borgvardt og Tryggva Guðmundssyni árið 2005.

„FH-ingar geta ekki kvartað yfir því að geta spilað í mismunandi leikkerfum. Það gerir FH enn óútreiknanlegra. Blikar geta að sama skapi bara spilað samkvæmt 4-3-3 leikkerfinu vegna þess að þeir eiga bara einn framherja [Ellert Hreinsson] sem hefur þó verið að hitna og skorað í tveimur deildarleikjum í röð.“

Líkleg byrjunarlið.

Ekki tapað 90 mínútna leik
Árið 2015 hefur verið gott hjá Breiðabliki og sjálfstraustið er mikið í liði Arnars Grétarssonar.

„Arnar hefur sem þjálfari Breiðabliks ekki tapað í 90 mínútna fótboltaleik allt þetta ár og skiptir þá engu hvað mótið heitir,“ segir Hjörvar en ekkert lið hefur fengið á sig færri mörk í deildinni en Breiðablik í ár.

„Ég held að það verði lítið skorað í þessum leik. Við fáum í allra mesta lagi þriggja marka leik,“ segir Hjörvar. „Eins og í öllum leikjum þá mun þetta ráðast af því hvort liðið gerir færri mistök. Og í undanförnum leikjum hafa FH-ingar gert varnarmistök í hverjum einasta leik.“

Hann telur að Breiðablik verði ekki jafn sókndjarft og í síðustu leikjum. „Stig væri mjög viðunandi fyrir Blika sem munu fara í Krikann til að verja stigið sitt.“

Leikurinn hefst klukkan 20.00 annað kvöld og verður í beinni útsendingu á Stöð 2 Sport.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.