SPRON-málið:„Þetta virkaði allt saman gríðarlega sterkt og öflugt”

Allir þeir sem ákærðir eru vegna tveggja milljarða króna lánveitingar SPRON til Exista þann 30. september 2008 töldu að félagið stæði vel og væri öruggur lántaki. Engin gögn hafi bent til annars og engar lánareglur hafi verið brotnar við lánveitinguna.

Alls eru fjórir fyrrum stjórnarmenn sjóðsins ákærðir vegna lánsins auk fyrrverandi forstjóra SPRON en sérstakur saksóknari telur fimmmenningana hafa farið út fyrir heimilidir sínar til lánveitinga með því að veita umrætt lán.

Árshlutauppgjör sýndi styrka stöðu Exista

Á stjórnarfundinum þar sem lán SPRON til Exista var samþykkt var lagt fram árshlutauppgjör félagsins fyrir fyrri hluta ársins 2008. Fram kom í máli Rannveigar Rist, sem var stjórnarmaður í sjóðnum og er ein ákærðu, að uppgjörið hafi sýnt styrka stöðu Exista.

„Við erum að lána þarna til aðila sem við teljum mjög öruggan. Þarna er leið til að koma á eðlilegri ávöxtun [á fjármunum sjóðsins] og leið til að auka arðsemi félagins. [...] Þetta virkaði allt saman gríðarlega sterkt og öflugt.”

Margrét Guðmundsdóttir, sem sat einnig í stjórn SPRON og er líka ákærð í málinu, sagði að það eina sem stjórnin hafi getað byggt á var sex mánaða uppgjör Exista sem kynnt var með lánsbeiðninni.

„Ég man að ég spurði út í tryggingar og það kom greinargóð skýring á því að tryggingarnar lægju í efnahagsreikningi Exista. Svo komu greinargóðar skýringar á peningamarkaðslánum og hvernig sá markaður virkaði. Þá var sérstaklega tekið fram að CAD hlutfallið [eiginfjárhlutfallið] væri í lagi og svo varpað upp á skjá sex mánaða uppgjöri Exista. Auk þess upplýsti Erlendur Hjaltason [stjórnarformaður SPRON og fostjóri Exista] að lausafjárstaðan væri góð til næstu níu mánða.”

Erlendur er ekki á meðal ákærðu í málinu þar sem hann vék af fundi stjórnarinnar áður en atkvæðagreiðslan um lánveitinguna fór fram. Stjórnarmenn sögðu þó fyrir dómi í dag að hann hafi tekið þátt í umræðum um lánveitinguna áður en hann fór af fundinum og meðal annars veitt upplýsingar um stöðu Exista.

„Al Thani viðskiptin voru skýrt merki um jákvæðni og bjartsýni”

Bæði Margrét og Rannveig gerðu svo kaup Al Thani á 5% hlut í Kaupþingi að umtalsefni fyrir dómi í dag. Exista var stærsti hluthafi Kaupþings og átti félagið því mikið undir því að bankinn stæði vel.

Magrét sagði að kaup Al Thani hefðu sannfært hana enn og aftur um það að Kaupþing væri sterkasti banki á Íslandi og með eign Exista í Kaupþingi væri því staða félagsins sterk.

„Al Thani viðskiptin voru skýrt merki um jákvæðni og bjartsýni,” sagði Rannveig. Hún kvaðst því ekki hafa óttast það neitt sérstaklega að veita Exista umrætt lán og vísaði jafnframt í neyðarlán Seðlabanka Íslands til Kaupþings sem veitt var viku seinna.

„Menn höfðu heilt yfir mikla trú og traust á Kaupþingi. [...] Svo eru sett hryðjuverkalög á bankann sem er alveg fordæmalaust og það var ógerningur að við sjórnarmenn í SPRON hefðum getað séð þessa stöðu fyrir.”