„Við reiknum með því að banda­rísk stjórn­völd séu með plan B“

Hæstiréttur Bandaríkjanna felldi í dag úr gildi stóran hluta þeirra tolla sem Donald Trump forseti hefur lagt á innfluttar vörur síðasta árið. Þeir tollar sem byggja á neyðarlögum eru taldir ólöglegir.

Niðurstaðan er sögð meiriháttar áfall fyrir Trump en hann hefur beitt tollum, og hótunum um að beita ríki þeim, í gríð og erg frá því að hann tók aftur við sem forseti í fyrra.

Margir tollanna byggðust á ákvæðum laga um valdheimildir forseta í efnahagsneyð. Sex af níu dómurum við hæstarétt töldu Trump ekki mega beita lögunum til þess að leggja tollana á.

Tollar á Ísland undir

Á meðal þeirra tolla sem hæstiréttur telur ólöglega eru svonefndir „gagnkvæmir“ tollar Bandaríkjastjórnar á önnur ríki, þar á meðal Ísland. Trump tilkynnti um þá í apríl en hefur ítrekað krukkað í þeim og hótað frekari tollum síðan.

Samtök iðnaðarins hafa látið tollamálið sig varða frá því að það kom upp og Sigurður Hannesson, framkvæmdastjóri samtakanna, segir í samtali við fréttastofu þau hafi fylgst náið með framvindunni í dag.

„Það má segja að það sé kominn nýr kafli í þessa sögu og óvissan sem ríkt hefur, hún heldur þá bara áfram. Hinn pólitíski vilji hefur verið skýr hjá bandarískum yfirvöldum um að leggja á tolla, þannig að þetta þýðir væntanlega að það þarf að hugsa um breytta framkvæmd eða breytta útfærslu til þess að ná fram þeim markmiðum en það má alveg reikna með því að það verði áframhald á þessum tollum.“

Bíða viðbragða Trumps

Sigurður segir menn nú bíða eftir yfirlýsingu Bandaríkjaforseta og hans viðbrögðum við dómi Hæstaréttar.

„Við reiknum með því að bandarísk stjórnvöld séu með plan B og muni þá senn kynna það, eða gefa einhverjar vísbendingar að minnsta kosti um það hvernig ný útfærsla kunni að verða.“

Á meðan óvissan sé eins mikil og hún er nú verði að bíða eftir viðbrögðum úti, sjá hvert umfangið verður, nákvæm útfærsla tollanna og framkvæmd þeirra.

„Það er svolítið erfitt að ráða í stöðuna núna en þetta, auðvitað, setur talsvert mikið strik í reikninginn fyrir bandarísk stjórnvöld, þessi dómur.