Móra bar tvisvar: Bóndinn hélt að hann væri ruglaður og vitlaus

Ærin Móra á bænum Heiði í Biskupstungum í Bláskógabyggð kom Brynjari Sigurðssyni, eiganda sínum, heldur betur á óvart þegar hún bar fimm lömbum í vikunni með tveggja daga millibili. Í fyrri burðinum komu þrjú lömb og í þeim síðari tvö lömb.

Á Heiði eru um 100 fjár og er um helmingur ánna borin. Brynjar á sér uppáhalds kind, hana Móru, sem er mögnuð þegar kemur að sauðburði því hún bar tvisvar í vikunni, fyrst á mánudaginn og síðan aftur á fimmtudaginn.

„Ég svo sem hélt að ég væri orðinn ruglaður og vitlaus en það var nú ekki, það komu hildir frá henni og svoleiðis. Ég bar þetta undir fleiri sauðfjárbændur á Facebook síðu og þeir sögðu að þetta hefði komið fyrir og það létti mér heilmikið,“ segir Brynjar. Honum var mikið létt að vera ekki meira ruglaður en vant er.

Brynjar segir sögu Móru ótrúlega. „Já, hún er ótrúleg. Af því að þetta er uppáhalds kindin mín, þá er gaman að þetta sé svona“.

Hann hefur fengið upplýsingar hjá dýralæknum um það hvernig svona getur gerst.

„Já, þeir segja að það séu tvö hólf í henni sem geyma lömbin, það hafi verið í sitthvoru hólfinu, hún hafi losað sig fyrst úr öðru og hinu seinna. Það er bara gaman að þessu.”

En eigum við að trúa því að þetta sé svona?

„Það er bara ekki um annað að ræða, ég verð að trúa því líka.”

En á Brynjar von á því að fleiri kindur hjá honum beri tvisvar?

„Nei, það ætla ég ekki að vona. En þetta er spurning, hvort framþróunin sé ekki svona. Láta þær bera tvisvar á ári. En það væri þá gott að hafa smá lengra á milli, ekki nokkra daga,” segir Brynjar og bætir því við að öll lömbin muni fá að lifa.