Mikil líkindi með Stokkseyrarmálinu og nýrri íslenskri glæpamynd

Ungur maður á einnar nætur gaman með fyrrverandi unnustu og barnsmóður ofbeldisfulls glæpamanns sem er í mikilli neyslu. Hann er tekinn gíslingu af gengi glæpamannsins með það fyrir augum að kúga út úr honum fé. Þegar þau áform verða að engu þá skapast atburðarás þar sem líf unga mannsins er í stórhættu. Ungi maðurinn er orðin gísl gengisins sem bregður á það ráð að fara austur fyrir fjall í þeim erindagjörðum að losa sig við hann. Þegar þangað er komið banka þeir upp á hjá gömlum félaga glæpamannsins sem er að reyna að snúa við blaðinu og ná lífi sínu á réttan kjöl.

Þannig hljómar söguþráður kvikmyndarinnar Austur sem verður frumsýnd á föstudag og er sögð innblásin af raunverulegum atburðum úr íslenskum undirheimum. Einhverjir hafa séð líkindi með söguþræði myndarinnar og Stokkseyrarmálinu svokallaða. Í því máli fengu fimm menn fangelsisdóm en þeirra á meðal var Stefán Logi Sívarsson sem var dæmdur til sex ára fangelsisvistar.

Sjá einnig:Stefán Logi og Stefán Blackburn dæmdir í sex ára fangelsi

Fimmmenningarnir voru dæmdir fyrir mannrán á tveimur mönnum en annar þeirra var félagi þeirra sem sagði Stefáni Loga frá ástarsambandi fyrrverandi kærustu Stefáns Loga og annars manns. Manninum sem sagði Stefáni Loga frá ástarsambandinu var haldið í hálfan sólarhring þar sem hann var beittur ofbeldi. Þá var maðurinn sem átti í sambandi við fyrrverandi kærustu Stefáns Loga einnig haldið nauðugum og beittur ofbeldi. Farið var með hann á Stokkseyri þar sem hann var beittur frekara ofbeldi og skilinn eftir í kjallara í húsi á Stokkseyri. Hann var síðar leystur úr haldi af húsráðanda á Stokkseyri.

Sjá einnig:Stokkseyrarmálið: Fórnarlambið sveipað plasti

Jón Atli Jónasson er leikstjóri og handritshöfundur myndarinnar Austur en hann segir myndina ekki eingöngu byggða á Stokkseyrarmálinu. „Það hafa komið upp nokkur svona mál og í raun eru þau svona kveikjan að þessu. Við erum ekki að gera mynd um þetta eina sérstaka mál. Auðvitað er margt líkt með því. Þegar um svona mál er að ræða þá fylgir það ákveðnum forsendum og ég er ekkert að segja það af því ég er hræddur við að segja eitthvað annað, ég er bara að segja um hvað myndin er,“segir Jón Atli.

Í stiklunni fyrir myndina er tekið sérstaklega fram að hún sé stranglega bönnuð börnum. „Fólki finnst hún óhugnanleg og viðfangsefnið er það. Þannig að það er ekkert út í bláinn heldur,“segir Jón Atli og bætir við að myndin takist á við íslenskan samtíma.

„Þetta er mynd sem er um eitthvað sem er að gerast núna og það er fyrst og fremst hlutverk kvikmynda, og ef þú spyrð mig persónulega, þá er það hlutverk listamanna að fjalla um samtímann fyrst og fremst. Svo er það bara með hvaða hætti menn gera það, það er bara undir þeim komið. Fyrst og fremst valdi ég þetta viðfangsefni því mig langaði til að gera mynd sem fjallar dálítið um ástandið á Íslandi í dag. Þó ég noti þessa sögu til að segja það þá hefur hún vonandi stærri vísun. Mig langaði að fanga þetta andrúmsloft sem mörgum þykir ríkja á Íslandi, einhverskonar undirliggjandi ótti og myrkur og vantraust.“

Björn Stefánsson fer með hlutverk fórnarlambsins í þessari kvikmynd, Ólafur Darri Ólafsson fer með hlutverk húsráðanda en þeir Hjörtur Jóhann Jónsson, Vigfús Þormar Gunnarsson, Arnar Dan Kristjánsson og Kristinn Már Jóhannesson fara með hlutverk glæpamanna.

Sjá má stiklu úr myndinni hér að neðan en lesendur eru minntir á að kvikmyndin er stranglega bönnuð börnum.