Af hverju er ástandið svona á Íslandi?

Á Íslandi gætum við öll haft það ágætt. Við eigum frábærar auðlindir, til dæmis fiskinn og orkuna, ár hvert eykst ferðamannastraumurinn til Íslands um tugi prósenta og reglulega koma fréttir um nýsköpunarfyrirtæki sem eru fremst allra í sínum geira.

Miðað við þessa mynd sem ég dreg upp ætti allt að vera í sómanum. En svo er því miður ekki. Gunnar Bragi utanríkisráðherra fer með eitthvað bréf til Evrópu sem enginn skilur og veit ekki einu sinni sjálfur hvort hann sé búinn að draga umsóknina um inngöngu í ESB til baka eða ekki.

Hér eru allir kjarasamningar að losna, von er á holskeflu af verkföllum og átökum á vinnumarkaði, ungt fólk sér ekki fram á það að geta flutt í eigið húsnæði, hvað þá að stofna fjölskyldu, íslensk fyrirtæki geta ekki borgað samkeppnishæf laun, ríka fólkið verður ríkara og fátæka fólkið verður fátækara og virðing fyrir náttúru Íslands er engin. Hér á að virkja allt sem hægt er að virkja og Sjálfstæðisflokkurinn mokar peningum í vildarvini og nánustu fjölskyldu.

Ekkert af þessu á að koma okkur á óvart, þú kennir ekki gömlum hundi að sitja. Sjálfstæðisflokkurinn og Framsóknarflokkurinn berjast alltaf fyrir þá ríku og sterku; útgerðarmenn og þá efnameiri. Ef við viljum breyta þessu og viljum t.d. fá sanngjarnt verð fyrir fiskveiðiauðlindina og orkuna okkar og ef viljum halda áfram að fá ferðamenn til að skoða náttúru okkar verðum við að koma þessum tveimur flokkum frá völdum.

Ef við viljum að þjóðin fái að taka ákvörðun um ESB og fái að kjósa um málið þarf núverandi ríkisstjórn að víkja. Ríkisstjórnin hefur heldur ekki sýnt neinn vilja til að höggva á hnúta á milli atvinnurekanda og launþega og húsnæðismálin eru í algjörum ólestri. Eygló Harðar, sem sést svo lítið í umræðunni að maður gleymir oft að sé ráðherra, hefur ekki gert neitt til að stuðla að því að ungt fólk geti flutt í sómasamlegt húsnæði og stofnað fjölskyldur.

Allar rannsóknir sýna vaxandi ójöfnuð í landinu, sem segir sig sjálft þegar skattar á útgerðarmenn eru lækkaðir. Þá verður meira eftir fyrir þá efnameiri. Á sama tíma eru skattar á matvæli hækkaðir, sem bitnar á þeim sem minnst hafa á milli handanna. Núverandi ríkisstjórn hefur augljóslega það markmið að vinna aðeins í þágu ríka fólksins.

Það er engin leið að virkja sig út úr þeim vandamálum sem við búum við núna. Sú orka sem í dag fer í stóriðju fer fyrir skammarlega lága upphæð.

Við skulum frekar búa í hreinu landi sem er að mestu leyti óspillt og passa upp á hálendið okkar. Það væri viturlegra að selja ferðamönnum aðgang að óspilltum náttúruperlum heldur en stóriðju.

Svo að þetta sé gerlegt þurfum við að henda Sjálfstæðisflokknum og Framsóknarflokknum í burtu, við getum ekki látið okkur bjóða þetta lengur. Það eru kosningar næst árið 2017 á Íslandi en ég er skíthræddur um að þá sé búið að gera of mikinn skaða fyrir okkur sem þjóð með þessa „litlu kalla“ við völd.

Ef við viljum réttlátt samfélag sem býður upp á jöfn tækifæri allra, sem passar upp á það að allir eigi rétt á menntun og heilbrigðisþjónustu, þurfum við að koma ríkisstjórninni frá. Ef við viljum að samfélagið taki framförum, að ungt fólk geti keypt sér húsnæði á Íslandi en ekki í öðrum ríkjum Evrópu, og ef við viljum koma í veg fyrir spillingu Bjarna Ben og ættar hans þurfum við að koma þessari ríkisstjórn frá helst í dag - því hver veit hvað þeir geta mokað í sig miklum peningum á morgun!