Heiðar snyrtir litgreinir kjólinn: „Hann er spanskgrænn“

Heiðar Jónsson snyrtir hafði ekki heyrt af kjólnum sem nánast allir hafa talað um í dag þegar Vísir náði af honum tali. Kjóllinn hefur vakið gríðarlega athygli og þjóðin nánast klofin í skoðunum sínum þegar kemur að lit hans. Vísir sá því ekki annað í stöðunni en að fá einn helsta litgreinanda landsins til að álykta um litinn.

„Þegar ég sá myndina af þessum kjól fór ég að hugsa; er það blái liturinn sem gerir þennan svarta lit spanskgrænan, eða er hann spanskgrænn? Það er eina vandamálið sem ég sé,“ sagði Heiðar eftir að hafa tekið sér örfáar mínútur til að litgreina umræddan kjól.

Kjóllinn er í raun ósköp venjulegur. Hann er blár og svartur að lit, en margir sjá hann hvítan og gylltan. Það er vegna þess að heilinn stjórnar því í hvaða lit við sjáum hluti. Í þessi tilfelli tökum við inn allt ljós sem kemur frá honum, en köstum frá okkur ljósi sem kemur frá bakgrunni hans. Því sjáum við litinn í samhengi við þá liti sem sjást umhverfis kjólinn. Þar af leiðandi verður erfitt að greina réttan lit.

„Hann er fagurblár og grásvartur og ég er búinn að kíkja á myndina núna nokkrum sinnum. Það sem hins vegar er skrítið, er að svarti liturinn sem ég sé hefur eiginlega ekkert nafn. Ekki nema í gamla daga en þá var hann kallaður spanskgrænn. Ég er prestssonur utan af landi og þegar hempan var orðin mjög gömul þá kom grámosgræn slikja á svarta litinn á hempu gömlu prófastanna. Hann er spanskgrænn og fagurblár,“ segir Heiðar.

Kjóllinn sé því í grunninn blár og svartur, en að litir taki á sig ýmsar myndir. „Blái liturinn er svo fagurblár. Það eru svo margir bláir litir. Kóngablár er skærari og fánablár er gulari. Skærblár er hann ekki því hann er fagurblár og svarti liturinn spanskgrænn. Þetta er litafræðin,“ bætir hann við.

Kjóllinn hefur vakið svo mikla athygli að framleiðendur hans hafa ákveðið að framleiða hann í hvítu og gylltu. Hann er þegar framleiddur í nokkrum litum en framleiðandinn, Roman Originals, hefur ákveðið að framleiða minnst þrjú hundruð kjóla til viðbótar í öllum litum.

Í hvaða lit sjáið þið, lesendur Vísis, kjólinn?