Neyðarstjórn skoðar að taka ákveðna hópa út fyrir sviga

Neyðarstjórn ferðaþjónustu fatlaðra kom saman í kvöld til að ræða þær umbætur sem þarf að gera á þjónustunni. Jóhannes Rúnarsson, framkvæmdastjóri Strætó, segir engar breytingartillögur beinlínis liggja fyrir eftir fundinn.

„Það er bara verið að vinna í þessu ferli,“ segir Jóhannes. „Það er verið að safna miklum upplýsingum. Þetta er náttúrulega umfangsmikið verkefni, þessi þjónusta sem Strætó er að sinna, og þau eru bara að reyna að átta sig á stöðunni þarna. Það er ekki verið að tala um neina kollsteypu, ekki ennþá allavega.“

Jóhannes segir að meðal þess sem er til skoðunar hjá neyðarstjórninni sé að bæta við starfsfólki og bílum, skoða menntun bílstjóra og jafnvel að taka ákveðna hópa sem ferðaþjónusta fatlaðra sinnir „út fyrir sviga.“

„Kannski þá fólk sem má ekki við því að vera að skipta um bílstjóra svona reglulega,“ segir hann. „Þurfa að vera með svona ákveðið „stabílítet.““

Sjá einnig: Starfsmönnum Strætó aftur kennt á kerfið bak við ferðaþjónustu fatlaðra

Ferðaþjónusta fatlaðra var nýlega sameinuð í öllum sveitarfélögum höfuðborgarsvæðisins, nema Kópavogi, og Strætó falin umsjá hennar. Síðan þá hafa ótal frásagnir borist af óhöppum og skipulagsleysi frá þeim sem treysta á þjónustuna, nú síðast í dag.

Þá var mjög fatlaður maður skilinn eftir á röngum stað og án þess að nokkur væri þar tilbúinn að taka á móti honum. Jóhannes segir Strætó harma atvikið en að hann hafi ekki upplýsingar um það hverju nákvæmlega var um að kenna.

„Ég hringdi í móðurina strax, baðst afsökunar og reyndi að sannfæra hana um að við værum að reyna að gera þetta betra. Það er svolítið erfitt að segja það þegar svona kemur upp, en  við erum samt að gera það.“