Alþjóðlegt orgelsumar í Hallgrímskirkju

Listvinafélag Hallgrímskirkju stendur fyrir Alþjóðlegu orgelsumri. Félagið flytur þá inn orgelleikara um hverja helgi og mun gera það fram til 9. ágúst.

Sumar helstu stjörnurnar á himni orgelleiks munu koma til landsins og einn af þeim er James D. Hicks sem leikur nú um helgina. Hann er Bandaríkjamaður en leikur mest norræn verk og býr í Noregi.

Hicks mun frumflytja nýtt verk eftir Hildigunni Rúnarsdóttur. Á tónleikunum mun hann njóta liðsinnis dóttur sinnar, Virginiu Hicks sópransöngkonu. Saman munu þau flytja verk eftir Hicks sjálfan auk annarra verka, norrænna og bandarískra.

Nýjasta verk Hildigunnar Rúnarsdóttur sem frumflutt verður um helgina ber nafnið Fantasía um Ísland, farsælda frón. Á sömu tónleikum má einnig heyra Sálmaforleik um Lofið Guð eftir Þorkel Sigurbjörnsson og verk eftir Karlsen, Sundberg, Mikkelsen og Sixten, auk verka eftir Hicks sjálfan og J.K. Paine.

Inga Rós Ingólfsdóttir, framkvæmdastjóri Listvinafélagsins, stendur að skipulagningu tónleikanna.

„James er vel þekktur úti í heimi og við erum því gífurlega spennt að fá hann. Þetta er í fyrsta skipti sem hann kemur til landsins sem er merkilegt þar sem hann spilar mikið af norrænum verkefnum og sum þeirra eru íslensk,“ segir Inga.

James D. Hicks er fæddur í Bandaríkjunum og hlaut þar menntun og starfsframa, en hann starfaði m.a. í 26 ár við Biskupakirkjuna í Morristown í New Jersey. Á síðustu árum hefur áhugi hans beinst að Norðurlöndum þar sem hann hefur dvalið við upptökur og tónleikahald. Hann hefur tekið upp nokkra orgelgeisladiska sem innihalda að mestu leyti norræn verk.

Í sumar munu íslenskir orgelleikarar einnig spila í Hallgrímskirkju öll fimmtudagshádegi. Fyrri tónleikar Hicks eru í dag, laugardaginn 27. júní, kl. 12 á hádegi og er miðaverð 2.000 kr. Síðari tónleikarnir verða á morgun, sunnudaginn 28. júní, kl. 17 og miðaverð er 2.500 kr.- gj