Ítalarnir óeftirminnilegir: „Ég hafði miklar væntingar“

„Þeir voru ekki lélegir en flutningurinn var miðað við flutninginn á úrslitakvöldinu sjálfu þá munaði töluverðu. Og hann reis ekki upp yfir hin lögin þrátt fyrir að þeir hafi verið síðastir á svið,“ segir Einar Bárðason um flutning ítalska tríósins Il Volo á Eurovision keppninni um helgina. Einar telur ekkert óeðlilegt við það að dómnefndir landanna skuli horfa á aðra keppni heldur en Evrópubúar, og í ár Ástralar.

Athygli hefur vakið að íslenskir kjósendur vildu gefa Ítalíu 12 stig og þeir höfnuðu í 1. sæti eftir símakosningu. En dómnefnd Íslands setti Ítalina í 11. sæti hjá sér sem þýðir ekkert stig. Því fengu þeir rétt um 6 stig frá Íslandi.

Sjá einnig: Íslenskir kjósendur vildu gefa Ítalíu 12 stig

Óeftirminnilegur flutningur Ítalanna

„Það sat lítið eftir af flutningnum,“ útskýrir Einar sem var einn af dómnefnd Íslands. Aðrir í dómnefnd voru Í dómnefnd Íslands voru Ragna Kjartansdóttir, einnig þekkt undir listamannsnafn­inu CELL7, Védís Hervör Árnadótt­ir, Einar Bárðarson, Unnur Sara Eldjárn, Birgitta Haukdal og Heiðar Örn Kristjánsson.

Athygli hefur vakið að tveir dómaranna settu Ítalina afar neðarlega eða í 20. og 25. sæti. Hinir þrír settu Ítalina í efstu fimm sætin eða í það fimmta, þriðja og annað. Einar segist sjálfur hafa sett Ítalina fremur ofarlega en getur ekkert tjáð sig um stigagjöf annarra dómara.

„Ef ég er þekktur fyrir eitthvað í tónlist þá er það að hafa náð að blanda klassískri tónlist saman við poppið. Eins og ég gerði með Garðar Cortez sem dæmi. Ég hafði miklar væntingar,“ segir Einar.

Dómnefnd horfir á aðra keppni en Evrópa

Hann bendir á að í það heila hafi dómnefndir Evrópu sett Ítalina í sjötta sæti en Ísland sem ein af fjörutíu þjóðum hafi ekki slegið þá úr fyrsta sætinu.



En er ekkert undarlegt við það að dómnefndir skuli fylgjast með í raun annarri keppni en Evrópa?

„Nei það er ekkert óeðlilegt. Eins og ég skil þetta þá sinna dómnefndir tvenns konar hlutverki, annars vegar að gefa stigin og hins vegar erum við varaaflstöð ef eitthvað skyldi koma upp í símaatkvæðagreiðslunni hérna heima.“

Hann bendir á að það taki tíma að leggja saman atkvæði dómnefndar, það eru fimm einstaklingar í hverri nefnd og um fjörutíu lönd taka þátt í að velja það atriði sem sigrar.

Sjá einnig: Ítalir sigruðu í símakosningu

„Við erum ekki í tölvu, það þarf að leggja þetta allt saman og passa að það sé allt rétt og tryggja svo að þetta skili sér rétt á áfangastað.“ 

Mikið umstang er í kringum atkvæðagreiðslu dómnefndar sem hefur 50 prósent vægi á móti símakosningu. „Við þurfum með margra vikna fyrirvara að koma upp í útvarp og skrifa undir heilindayfirlýsingu og afhenda afrit af vegabréfunum okkar,“ útskýrir Einar. „Svo kemur fulltrúi frá alþjóðlegum endurskoðanda sem fylgist með því að réttir aðilar mæti til dómnefndastarfa.“