Hundur Önnu Mjallar meig næstum á málverk

 „Þetta hefði getað endað sem mjög dýrkeypt klósettferð fyrir Buddy,” segir tónlistarkonan Anna Mjöll Ólafsdóttir.

Hundurinn hennar, Buddy, var mjög nálægt því að pissa á rándýrt málverk á listasýningu sem fram fór á Laurel Canyon í Los Angeles á dögunum.

Anna Mjöll var að aka heim frá Santa Barbara þegar á vegi hennar varð listasýning og ákvað hún að kíkja á hana til að drekka í sig fegurð og innblástur og tók hundana sína með sér

„Þegar við höfðum gengið fram hjá einu glæsilegasta málverkinu leit ég við og sá Buddy lyfta upp afturlöppinni um það bil að pissa á málverkið sem var nánast við jörðina. Ég fékk vægt áfall, kallaði nei og tók næstum handahlaup afturábak að Buddy og þreif hann upp,” segir Anna Mjöll.

Buddy er rúm 11 kíló að þyngd var á einu augabragði kominn undir arminn á Önnu Mjöll. 

„Ég hélt þá allt í einu á tveimur hundum, Bellu, lyklum, veski og Buddy. Ég reyndi þó að skakklappast hægt og virðurlega í burtu til þess að láta eins og ekkert hefði í skorist,” segir Anna Mjöll hlæjandi og bætir við; „Honum hefur greinilega ekki líkað málverkið.”

Búið er að bjóða Buddy á listasafn í Sun Valley í Idaho sem heitir Frederic Boloix Fine Arts.

„Eigandinn, Frederic Boloix, vill fá að vita álit Buddys á listaverkum Picasso, Chagall, Matisse og fleiri,” segir Anna Mjöll.

Þó Anna Mjöll búi í sólinni í Kaliforníu er hún byrjuð að undirbúa jólatónleika sem fram fara á Íslandi í desember.

„Ég er á fullu að undirbúa Jólatónleika, „Jólin Jólin“ sem verða haldnir í Salnum í Kópavogi 3. desember til heiðurs Pabba, Ólafi Gauki, sem hefði orðið 85 ára á þessu ári. Við verdum með góða gesti og mjög flotta hljómsveit. Þetta verður mjög skemmtilegt og ég hlakka mikið til.”