Ekki einhugur um hugleiðslunámskeið þingmanna

Þau Óttarr Proppé, þingmaður Bjartrar framtíðar, og Elín Hirst, þingmaður Sjálfstæðisflokksins, stóðu fyrir hugleiðslunámskeiði fyrir þingmenn í hádeginu í gær.

Námskeiðið, sem fór fram í salnum Hlaðbúð á þriðju hæð Alþingishússins, vakti spurningar hjá Vigdísi Hauksdóttur, þingmanni Framsóknarflokksins og formanni fjárlaganefndar, um hvert hlutverk þinghússins væri. „Ég er mjög hugsi yfir þessu nýja hlutverki Alþingishússins,“ segir hún í samtali við Fréttablaðið og bætir við: „Ég velti því upp hvort að ég ætti ekki bara að halda blómaskreytinganámskeið, fyrst við erum byrjuð á svona námskeiðum.“

Ágætlega sótt

Fréttablaðið ræddi við þingmenn í gær sem höfðu haft fregnir af þessum orðum Vigdísar, sem hún lét falla í Alþingishúsinu í gær, þegar námskeiðið var auglýst. Óttarr Proppé hafði þó ekki heyrt af þeim. „Ég hef ekki fylgst með því, nei,“ segir hann um hvaða skoðanir Vigdís hefur á námskeiðinu.

„Við höfum verið að tala um að svona gæti við gagnlegt fyrir okkur þingmennina. Við eigum að vera opin fyrir öllu sem getur hjálpað okkur að rækja störf okkar betur,“ segir Óttarr um hugmyndina að þessu hugleiðslunámskeiði. Hann segir námskeiðið hafa verið ágætlega sótt. „Þarna mættu nokkrir þingmenn. Við vorum svo heppin að einn kennari bauðst til að koma og miðla reynslu sinni.“

Þegar Óttarr er spurður um hvort kennarinn hafi nokkuð verið Björn Bjarnason, fyrrverandi dómsmálaráðherra sem kennir hugleiðslu, segir Óttarr ekki svo hafa verið. „Nei, þetta var ekki Björn, en þetta var örugglega í hans anda.“

Fleiri lýst yfir áhuga

Kennarinn á námskeiðinu var Sigrún Olsen, sem rekur Lótushús í Garðabæ.

„Við fengum hana Sigrúnu til að reyna að koma á jafnvægi á andrúmsloftið,“ segir Elín Hirst í léttum tóni. Elín hefur sjálf stundað hugleiðslu í dágóðan tíma.

„Já, ætli þetta séu ekki komin ein tíu eða tólf ár. Ég vissi að Óttar hafði líka verið í þessu að einhverju marki, þannig að við töluðum okkur saman og stóðum fyrir þessu. Þarna mættu sjö manns og ég fékk tölvupósta frá allavega tíu þingmönnum sem lýstu yfir áhuga á að koma næst. Námskeiðið bar að með nokkuð skömmum fyrirvara og margir þingmenn voru þá þegar búnir að bóka sig annað. Við munum því halda annað námskeið næsta þriðjudag.“

Námskeið þingmanna

Eins og margir vita er Vigdís Hauksdóttir menntuð í blómaskreytingum. Ef hugmynd hennar, að hún haldi slíkt námskeið, verður að veruleika mætti spyrja sig hvaða aðrir þingmenn gætu frætt þingheim um nytsamlega en skemmtilega hluti, sem eru kannski ekki alltaf í umræðunni. Fréttablaðið tók saman nokkra sem gætu eflaust haldið skemmtileg námskeið.

Kökuskreytingar Bjarna

Bjarni Benediktsson fjármálaráðherra er þekktur fyrir áhuga sinn á kökuskreytingum. Bjarni hefur oft birt á Facebook-síðu sinni myndir af kökum sem hann hefur bakað og skreytt og hafa þær vakið mikla lukku þar.

Katrín með galdra

Katrín Jakobsdóttir, formaður Vinstri grænna, er töframaður. Hún er meðlimur í Hinu íslenska töframannagildi, félagi töframanna hér á landi. Katrín gæti eflaust kennt þingmönnum einhver töfrabrögð.

Bollywood-dansar Helga Hrafns

Helgi Hrafn Gunnarsson, þingmaður Pírata, lauk nýlega námskeiði í Bollywood-dansi ásamt Ingu Auðbjörgu Kristjánsdóttur, unnustu sinni. Þau þóttu standa sig með prýði á námskeiðinu og telja þeir sem til þekkja að Helgi sé líklega fyrsti karlmaðurinn til þess að ljúka námskeiði af þessu tagi hér á landi.