Fleiri knatthús í Reykjavík

Í Kópavogi, Hafnarfirði, Akranesi, Akureyri, Grindavík, Reykjanesbæ, Reyðarfirði og meira segja á Höfn í Hornafirði er búið að byggja glæsileg knatthús, þ.e. yfirbyggða knattspyrnuvelli.

Þar geta börn, krakkar og unglingar á öllum aldri æft knattspyrnu yfir vetrartímann innanhúss í knatthúsum. Algjör bylting í aðstöðu. Í sumum bæjarfélögunum eru meira að segja komin tvö knatthús. Í Reykjavík, 120 þúsund manna borg þar sem um 30 þúsund börn, krakkar og unglingar búa, er eitt knatthús, þ.e. Egilshöll. Strákar og stelpur frá fyrsta ári í grunnskóla og upp úr sem búa í Reykjavík og hafa áhuga á og vilja til að æfa knattspyrnu verða yfir vetrarmánuðina að æfa knattspyrnu úti í öllum veðrum, þó oftast í rigningu eða snjókomu.

Knattspyrna er orðin heilsársíþrótt fyrir suma, sum bæjarfélög og sum íþróttafélög og hefur árangur þeirra barna-, krakka- og unglingaliða sem og meistaraflokksliða verið öðrum fremri.

Fyrir nokkru setti ég sem einn af sjö aðalfulltrúum í Íþrótta og tómstundaráði Reykjavíkurborgar fram fyrirspurn sem áframsend var á öll níu hverfisíþróttafélög borgarinnar sem hafa knattspyrnudeildir. Hún var einnig send Íþróttabandalagi Reykjavíkur og Knattspyrnusambandi Íslands og var tilgangurinn sá að meta þörf á nýju og öðru knatthúsi í Reykjavík og ef menn teldu þörf á hvaða staðsetningum þeir myndu mæla með.

Knattspyrna er ein vinsælasta íþrótt heims, ein vinsælasta íþrótt landsins og ein vinsælasta íþrótt Reykvíkinga. Í nánast öllum hverfisíþróttafélögum borgarinnar er knattspyrna sú íþrótt sem hefur flesta iðkendur og það jafnvel langtum fleiri iðkendur en aðrar íþróttagreinar félaganna. Samkvæmt svörum félaganna er það klárt mál að Reykjavíkurborg þarf að huga hratt að því að styðja við knattspyrnuna í borginni með nýjum yfirbyggðum knattspyrnuvelli í Reykjavík sem fyrst og jafnvel tveimur.

Hvað segja félögin?

Hér má sjá brot af því sem hverfisíþróttafélögin segja um þörfina á nýju/öðru knatthúsi í Reykjavík og hvaða staðsetningar voru nefndar.

Fjölnir: „klárlega þörf fyrir annan yfirbyggðan knattspyrnuvöll í Reykjavík“, „í vesturhluta borgarinnar“.

Fylkir: „hvetur til þess að bætt verði úr aðstöðu til knattspyrnuiðkunar með innanhússaðstöðu“, „bætt við öðru húsi, t.d. í Laugardal“.

Leiknir: „Það er gríðarleg þörf á knatthúsum í Reykjavík“, „byggja lítil knatthús á svæðum félaganna“.

ÍR: „ný inniaðstaða myndi renna sterkari fótum undir knattspyrnuiðkun í borginni“, „suður Mjódd“.

Víkingur: „það er skoðun okkar Víkinga að þörfin fyrir annað hús sé mikil“, „Laugardalurinn“, „svæði Markarinnar“.

Valur: „Það er morgunljóst að vöntun er á öðru knatthúsi í Reykjavík“, „svæðið sem þarf að styrkja er vestan megin við Elliðaárnar“.

KR: „Við KR-ingar erum talsmenn þess að byggja minni hús, hús sem eru 50 x 75 og 9-10 m há“, „ef það er niðurstaða manna að byggja annað yfirbyggt knattspyrnuhús í Reykjavík ætti það að rísa í Örfirisey“.

Fram: „Egilshöll getur með engum hætti fullnægt þörf íþróttafélaganna í Reykjavík“. „Við teljum að minni æfingahús í nágrenni við stóru íþróttafélögin séu eitthvað sem muni nýtast betur en eitt stórt hús“.

ÍBR: „Innanhússaðstaða fyrir knattspyrnu skorar sérstaklega illa fyrir Reykjavík“, „ný höll verði byggð í Laugardal, nánar tiltekið á gervigrasinu í Laugardal“.

KSÍ: „telur engan vafa á því að þörf sé á fleiri knatthúsum í Reykjavík“, „tilkoma þessara húsa hefur án nokkurs vafa sannað gildi sitt og eftirspurn félaga í Reykjavík er langt umfram þá tíma sem félögum standa til boða. Knatthúsin hafa fjölgað iðkendum og aukið gæði knattspyrnunnar og því er augljóst að veruleg þörf er á fleiri knatthúsum“.

Knattspyrnufélög sem hafa aðgang að knatthúsi ná betri árangri í sínu barna-, krakka- og unglingastarfi, meistaraflokksstarf þeirra færist á enn hærra stig og gerir íþróttina sem er vinsælasta íþrótt landsins og borgarinnar fullkomlega að heilsársíþrótt.

Við þurfum fleiri knatthús í Reykjavík!