LÖKE-málið: „Ein lög fyrir lögreglustjórann og ein lög fyrir lögreglumanninn“

Aðalmeðferð í LÖKE-málinu svokallaða er á dagskrá Héraðsdóms Reykjavíkur á morgun en ríkissaksóknari hefur nú ákveðið að falla frá fyrsta hluta ákærunnar í málinu.

Í ákæruliðnum var lögreglumaðurinn Gunnar Scheving Thorsteinsson sakaður um að hafa flett upp nöfnum 41 konu í upplýsingakerfi lögreglunnar, LÖKE. Kjarninn greindi fyrst frá málinu en í samtali við Vísi staðfesti Garðar Steinn Ólafsson, lögmaður Gunnars, að fallið hefði verið frá ákæruliðnum

Seinni hluti ákærunnar stendur eftir en þar er Gunnari gefið að sök að hafa miðlað persónuupplýsingum til þriðja aðila sem áttu að fara leynt. Á hann að hafa sent tölvuskeyti á Facebook með upplýsingum sem leynt áttu að fara. Gunnar er sagður hafa sent nafn og lýsingu á þrettán ára dreng sem hann hafði afskipti af í starfi sínu sem lögreglumaður, auk upplýsinga um ástæðu afskiptanna.

Ákæran byggð á röngum upplýsingum

„Þetta eru mjög blendnar tilfinningar en það er auðvitað gott að fá viðurkennt það sem við höfum alltaf haldið fram. Það er þó voðalega sorglegt að það hafi tekið allan þennan tíma að afla þessara gagna og láta tæknimann athuga hvort að þessar ásakanir væru sannar áður en að mannorðið er eyðilagt,“ segir Garðar.

Hann segir að ákæran hafi byggt á upplýsingum sem fengnar voru frá lögreglunni á Suðurnesjum en þær hafi ekki reynst réttar. Alda Hrönn Jóhannsdóttir, þáverandi yfirlögfræðingur hjá lögreglunni á Suðurnesjum og núverandi aðstoðarlögreglustjóri á höfuðborgarsvæðinu, stýrði rannsókn málsins, að sögn Garðars.

Engin rannsókn framkvæmd

„Það voru engar sannanir, bara fullyrðingar. Því er hins vegar haldið fram í lögregluskýrslur að þær séu réttar. Saksóknari virðist því hafa tekið því svo að það hafi farið fram rannsókn í tölvukerfi til að staðfesta þetta. Ég talaði við mennina sem bera ábyrgð á tölvukerfi ríkislögreglustjóra og fékk þau svör að þeir hefðu verið beðnir um ákveðnar upplýsingar úr kerfinu en ekki að framkvæma rannsókn.“

Garðar segir að aldrei hafi fram nein rannsókn á því hvort að Gunnar hafi flett einstaklingum upp í LÖKE-kerfinu en eftir stendur seinni ákæruliðurinn um miðlun upplýsinga sem áttu að fara leynt.

„Já, það er þessi meinti ákæruliður um það sem Sigríður Björk var sek um," segir Garðar og vísar þar til þess að Persónuvernd taldi Sigríði Björk Guðjónsdóttur, lögreglustjóra, hafa brotið lög þegar hún afhenti Gísla Frey Valdórssyni greinargerð um Tony Omos og fleiri aðila.

„Það eru ein lög fyrir lögreglustjórann og ein lög fyrir lögreglumanninn. Skjólstæðingur minn var reyndar ekki að miðla upplýsingum til manns sem var að tala við fjölmiðla heldur til einkavinar síns um að hann hafði orðið fyrir árás.“

Í nóvember síðastliðnum var ákveðið að þinghald í málinu yrði lokað þar sem óhjákvæmilegt væri að nefna konurnar á nafn sem Gunnar átti að hafa flett upp. Þó að fallið hafi verið frá þeim ákærulið segist Garðar engu að síður hafa farið fram á að þinghald yrði áfram lokað vegna seinni ákæruliðsins þar sem ekki væri ástæða til að nafn drengsins yrði opinberað.