Hvers vegna ættu Íslendingar að hætta að nota plastpoka?

Við erum nemendur í Langholtsskóla og erum búin að vera að vinna í allskonar verkefnum í náttúrufræði og samfélagsfræði sem tengjast ástandi jarðar, þar á meðal plastmengun.

Þetta verkefni tengist því að jörðin sé í hættu og við ákváðum að gera eitthvað í málunum.

Því viljum við koma á framfæri nokkrum ástæðum um hvers vegna Íslendingar ættu að hætta að nota plastpoka:

• Plastpokar eru ein helsta uppistaðan í plastmenguninni sem er að eyðileggja heimshöfin, drepa lífið í sjónum, eyðileggja vistkerfi og menga matinn okkar.

• Plastpokar eru gerðir úr olíu, en olíuiðnaðurinn er einn sá skaðlegasti í heimi bæði í samfélagslegum og umhverfislegum skilningi.

• Hver plastpoki er aðeins notaður í 20 mínútur að meðaltali, en brotnar ekki niður í náttúrunni nema á hundruðum eða þúsundum ára.

• Ólíkt mörgum öðrum plastvörum er erfitt að endurvinna plastpoka, sem þýðir að flestir þeir plastpokar sem við notum enda sem mengun í náttúrunni.

• Árið 2012 eyddu Íslendingar 3,2 milljarði króna af erlendum gjaldeyri í plastpakkningar sem að mestu leyti eru einnota. Hægt er að lækka þessa upphæð stórlega með því að nota fjölnota poka sem eru endurvinnanlegir og/eða lífbrjótanlegir.

• Stjórnvöld víðs vegar um heim eru að gera eitthvað í þessum málum og um 40% heimsbyggðarinnar býr á svæðum þar sem notkun plastpoka er nú þegar takmörkuð eða bönnuð.

Það þarf ekki að taka stórt skref til þess að hjálpa umhverfinu. Það er hægt að skipta plastpokum út fyrir taupoka, umhverfisvæna poka sem brotna niður í náttúrunni í stað plastpoka undir heimilissorpið.

Ef ske kynni að þú myndir gleyma taupokanum heima, kannaðu þá hvort að verslunin bjóði ekki upp á pappakassa, taupoka eða fjölnota poka.

Tökum saman höndum og verndum jörðina!



Arngunnur Hinriksdóttir, Brimar Þorleifsson, Brynja Björg Kristjánsdóttir, Mariana Afonso og Róbert Eðvarð Jóhannsson, nemendur í 9. bekk í Langholtsskóla.