Fyrstu nýliðarnir í þrjú ár sem vinna ríkjandi Íslandsmeistara

Leiknismenn unnu í gær 1-0 sigur á Stjörnunni í 14. umferð Pepsi-deildar karla og Breiðhyltingar komust fyrir vikið upp úr fallsæti.

Miðvörðurinn Halldór Kristinn Halldórsson skoraði sigurmarkið fimmtán mínútum fyrir leikslok og tryggði Leikni þar með fyrsta sigur félagsins síðan í maí.

Þetta var jafnframt í fyrsta sinn frá árinu 2012 sem nýliðar vinna ríkjandi Íslandsmeistara en Íslandsmeistarar KR töpuðu það sumar fyrir báðum nýliðunum deildarinnar, ÍA og Selfoss.

Undanfarin tvö sumur höfðu meistarnir unnið 6 af 8 leikjum sínum gegn nýliðum og hinir tveir leikirnir hafa endað með jafntefli. Stjarnan hefur lokið leikjum sínum á móti nýliðunum í Pepsi-deildinni í sumar og Garðbæingar urðu að sætta sig við það að ná aðeins í fimm stig af tólf mögulegum.

Nýliðar hafa annars ekki unnið marga sigra á ríkjandi meisturum síðustu ár en Víkingar afrekuðu að vinna 6-2 stórsigur á Breiðabliki á útivelli haustið 2011 sem var þá fyrsti sigur nýliða á meisturum í sjö ár.

Á þessari öld hafa Íslandsmeistarar tapað níu sinnum fyrir nýliðum í titilvörn sinni en FH-liðið frá 2001 er eina liðið sem tókst að vinna báða leiki sína á móti ríkjandi Íslandsmeisturum á þessum tíma.

FH-ingar hafa ennfremur aldrei tapað sjálfir fyrir nýliðum í titilvörn en FH-liðið hefur unnið 18 leiki auk þess að gera 6 jafntefli í 24 leikjum sínum á móti nýliðum sumarið eftir að Íslandsmeistaratitilinn kom í Kaplakrika.

Leiknismenn fengu alls fjögur stig út úr leikjunum tveimur á móti Íslandsmeisturum Stjörnunnar í Pepsi-deildinni í sumar því liðin gerðu 1-1 jafntefli í fyrri leiknum í Garðabænum.



Sigurleikir nýliða gegn ríkjandi Íslandsmeisturum á þessari öld:

2015

Leiknir: 1-0 sigur á Stjörnunni (heima)

2012

ÍA:  3-2 sigur á KR (heima)

Selfoss: 1-0 sigur á KR (heima)

2011

Víkingur R.: 6-2 sigur á Breiðablik (úti)

2004

Keflavík: 3-1 sigur á KR (heima)

2002

Þór Ak.: 1-0 sigur á ÍA (úti)

2001

FH: 2-0 sigur á KR (úti)

FH: 2-1 sigur á KR (heima)

Valur: 4-2 sigur á KR (heima)