Hlíðarfjall varð af miklum tekjum yfir páskatímann

„Um þrjátíu prósent af allri innkomu yfir veturinn er yfir páskatímann ,“ segir Guðmundur Karl Jónsson, forstöðumaður skíðasvæðisins í Hlíðafjalli við Akureyri. Lokað var í fjallinu á föstudeginum langa, á laugardeginum daginn eftir og á páskadag.

„Þetta eru þrír stórir dagar sem skipta máli. Páskadagur og föstudagurinn langi eru stærstu dagarnir á hverjum vetri. Þá erum við oft með á milli þrjú og fjögurþúsund gesti á dag,“ segir Guðmundur. „En nú var bara tómt í fjallinu.“

Því er ljóst að skíðasvæðið varð af all-miklum tekjum þetta árið. „Páskarnir voru ekki eins og við höfðum gert okkur væntingar um,“ segir Guðmundur. „En svona er veðrið og þetta er hluti af því að vera með skíðasvæði. Páskarnir komu ekki á réttum tíma í ár fyrir okkur veðurfarslega séð.“

Veðrið opnaði augu fólks fyrir nýjum leiðum

Suðvestan átt var í fjallinu og segir Guðmundur að Hlíðarfjall sé sérstaklega viðkvæmt fyrir þeirri átt. Skíðasvæðin í bæjum rétt við Akureyri séu ekki jafn viðkvæm. Til dæmis hafi verið opið á Siglufirði og þar fylltist bærinn af skíðafólki. Á Dalvík hafi líka verið talsverður fjöldi skíðafólks. 

Skíðafólkið hafi því ekki allt þurft að verða fyrir vonbrigðum með ferðir sínar norður í land. Á skíðasvæðinu í Hlíðarfjalli reyndu starfsmenn svæðisins líka að reyna að komast til móts við skíðagarpa.

Þar var búin til skíðaleið sem liggur frá bílastæðinu sem er í um 500 metra hæð yfir sjávarmáli og niður að orlofshúsunum sem eru í um 160 metra yfir sjávarmáli. Leiðin er um 2,2 kílómetra löng og fallhæðin er upp á tæpa 300 metra að sögn Guðmundar. Heimþráin kallast þessi nýja leið.

„Við vorum svo með litlar rútur og skutluðum fólki uppeftir.“

Fjölmargir nýttu sér þetta tiltæki. „Það var þó ekkert í líkingu við þann fjölda sem við áttum von á yfir helgina. En undantekningalaust fannst fólki þetta skemmtilegt og góð tilbreyting,“ segir Guðmundur.

Suðvestan áttin fjarar út að hans sögn í um 400 metra hæð yfir sjávarmáli og því var ágætis veður á leiðinni niður fyrir þá sem fóru.

„Við gerðum þetta í tilraunaskyni og við eigum eftir að þróa þessa leið hér í framtíðinni. Þetta opnaði augu fólks fyrir nýjum tækifærum,“ segir Guðmundur. 

Post by Hlíðarfjall Akureyri.