Ólafur: Midtjylland með sterkasta liðið

Ólafur Kristjánsson, þjálfari FC Nordsjælland, segir að mótherjar lærisveina sinna á morgun, Midtjylland, séu með sterkasta liðið um þessar mundir.

Midtjylland er á toppnum eftir sjö leiki, en liðið er með átján stig, tveimur meira en Randers sem er í því öðru. Nordsjælland er í fjórða sæti með þrettán stig.

„Midtjylland er með sterkasta liðið um þessar mundir. Þeir eru með betra lið en á síðasta ári og ég held að þeir hafi lært mikið af því tímabili," sagði Ólafur við bold.dk, en Midtjylland lenti í þriðja sæti á síðasta tímabili.

„Við trúum þó á okkur og við munum reyna nýta okkar möguleika. Þeir eru þó líklegri til sigurs eins og má sjá með því að kíkja á töfluna."