Synda til minningar um Guðlaugssundið

Það var líf og fjör í sundlauginni á Hvolsvelli í gær þegar áheitasund til minningar um Guðlaugssundið var synt.

Byrjað var að synda kl. 6:15 um morguninn og fram að lokun sundlaugarinnar syntu alls um hundrað manns á öllum aldri samtals 81,5 km.

Sveitarfélagið Rangárþing eystra ákvað að greiða 100 krónur fyrir hverja 100 metra sem syntir voru ásamt því að hægt var að leggja frjáls framlög inn á reikning og söfnunarbaukur var á staðnum.

Öllum þeim peningum sem safnaðist verður varið í viðhald og hreinsun á Seljavallalaug undir Eyjafjöllum.

Þann 11. mars 1984 synti Guðlaugur Friðþórsson tæpa 6 km til lands í svartmyrki og ísköldum sjónum eftir að vélbáturinn Hellisey VE 503 fórst við Vestmannaeyjar.