Tónleikar til styrktar níumenningunum

Haldnir verða tónleikar í Háskólabíói á miðvikudag til styrktar níumenningunum sem á dögunum fengu dóm í Gálgahraunsmálinu. Tilgangur tónleikanna er að safna fé sem afhent verður níumenningunum og jafnframt til þess að sýna baráttu þeirra samstöðu með tónlist og gleði, að því er fram kemur í tilkynningu frá tónleikahöldurum.

Dómur féll í máli þeirra níu fyrr í þessum mánuði en hverjum og einum er gert að greiða 100 þúsund krónur í sekt auk 150 þúsund króna í málskostnað.

Fjölmargir munu leggja sitt af mörkum og stíga á stokk til styrkar níumenningunum og má þar nefna Bubba Morthens, Diktu,  Jónas Sig, Unnstein Manúel, AmabAdamA og Prins Póló.

Hægt er að nálgast miða á tónleikana á Miði.is.