Tímaspursmál hvenær Guðný missir bætur aftur

Tryggingastofnun Ríkisins hefur endurskoðað mál Guðnýjar Lindu Óladóttur, en Vísir birti tölvupóst sem hún sendi forsætisráðherra og heilbrigðisráðherra í morgun. Þetta kemur fram í tilkynningu frá stofnuninni.

Guðný er 42 ára öryrki, með ónýt lungu og bíður eftir því að komast í lungnaígræðslu í Gautaborg. Þann 1. mars síðastliðinn fékk hún 26.081 krónu frá Tryggingastofnun, sem er einungis brot af því sem hún er vön að fá. Ástæða þess að Guðný fékk svona lítið er að síðastliðna tólf mánuði hefur hún verið meira en 180 daga á sjúkrastofnun.

Upplýsingar stofnunarinnar um sjúkralegu Guðnýjar voru misvísandi og því höfðu greiðslum til hennar verið breytt of snemma. Þær hafi nú verið leiðréttar og henni upplýst um rétt sinn.

Í samtali við Vísi segir Guðný að hún muni því fá fullar bætur í mars og í apríl. Þann 1. maí lendur hún þá aftur í sömu stöðu og í hún lenti í 1. mars. „Reglan er enn við lýði og þetta mun koma niður á mér aftur sem og öðrum. Það að ég skildi hafa farið af bótum núna 1. mars var vegna mistaka í legugögnum hjá þeim,“ segir Guðný.

„Þetta er bara tímaspursmál og ég á eftir að lenda í þessu aftur 1. maí, því ég er föst hér á Borgarspítalanum og svo fer í út í ígræðslu þegar að því kemur. Hvenær sem það verður bíða mín allavega sex vikna sjúkralega í Gautaborg. Ef ekki lengri.“

Í tilkynningu frá TR segir að í lögum um almannatryggingar komi meðal annars fram að ef elli- eða örorkulífeyrisþegi dvelji lengur en mánuð samfellt á stofnun sem sé á föstum fjárlögum falli bætur hans niður. Ef dvölin hefur varið lengur en samtals 180 daga á síðustu 12 mánuðum.

Þó sé hægt að sækja um framlengingu bóta þegar greiðslurnar falli niður. Við afgreiðslu umsókna sé sérstaklega litið til þess hvort framlenging sé nauðsynleg vegna afborgana eða annars rekstrarkostnaðar húsnæðis. Framlenging er heimil í sex mánuði að hámarki. Ef lífeyrisþegi hafi barn á framfæri sínu, á hann rétt á barnalífeyri sem fellur ekki niður ef lífeyrisþegi falli af bótum vegna dvalar á stofnun.

Þegar lífeyrisgreiðslur falla niður vegna dvalar á stofnun er heimilt að greiða vasapeninga, sem eru tekjutengdir og eru að hámarki 51.800 krónur á mánuði. Þeir falla alveg niður ef tekjur fara yfir 76.692 krónur á mánuði. Þegar sjúkrahúsvist lýkur fara bætur aftur af stað í þeim mánuði sem viðkomandi er útskrifaður.

Þá segir einnig í tilkynningunni að fjöldi einstaklinga sem voru stöðvaðir á bótum vegna sjúkrahúsavistar voru 43 árið 2012 og 46 í fyrra.

Ástæða þess að Guðný vakti þó athygli á málinu á Facebook var sú að reglan sem veldur því að fólk missi bætur, er að hennar mati ómannúðleg. Hún vill að Alþingi breyti reglunni. „Þetta er þeirra að laga, sem fyrst,“ segir Guðný.

Guðný er nú á Borgarspítalanum en bíður eftir því að komast til Gautaborgar í lungnaígræðslu. „Ég sit bara hér föst og kemst ekki spönn fyrir rassi og vonast til þess að Svíþjóð hringi í mig sem fyrst.“